Сяргей Таміленка: Мы салідарныя з беларускімі калегамі
У грузінскім Тбілісі і армянскай Гюмры адбываецца міжнародная канферэнцыя „Медыя дыялог”, на якой прысутнічаюць прадстаўнікі: Беларусі, Грузіі, Арменіі, Нямеччыны і Украіны.
Кажа кіраўнік „Нацыянальнага саюзу журналістаў Украіны” Сяргей Таміленка:
– З першых дзён пратэстаў, калі мы пачалі атрымліваць інфармацыю пра тое, што правы нашых калег-журналістаў Беларусі брутальна парушаюцца, што адбываюцца рэпрэсіі, мы з першых дзён асудзілі гэтыя рэпрэсіі. Сачылі за сітуацыяй з калегамі, перадусім аб’яднанымі ў „Беларускай асацыяцыі журналістаў”, а таксама ў межах „Еўрапейскай федэрацыі журналістаў” з іншымі калегамі. Таксама абгаворвалі розныя варыянты магчымай падтрымкі.
На думку Сяргея Таміленкі, зараз падтрымка беларускіх калег недастатковая:
– Саміх журналістаў у грамадскіх арганізацыях, рухах, суполках відавочна не дастаткова. Неабходныя нейкія саюзнікі на ўзроўні ўрадаў еўрапейскіх краін, штатаў, асобных фондаў, бо гэта пытанне выжывання нашых калег.
Праект прафінансаваны нямецкім урадам, у яго межах адбываюцца сустрэчы ў дзвюх краінах. Ён сабраў журналістаў з 5-ці краін, а яго дзейнасць разлічана на некалькі гадоў.
Беларускае Радыё Рацыя
