Сяргей Верамеенка паскардзіўся на дзеянні міліцыі
Гарадзенец Сяргей Верамеенка, вырашыў не пакідаць па-за ўвагай супрацьпраўныя дзеянні міліцыянтаў 18 лютага ў выбарчым участку на Альшанцы, адным з мікрараёнаў абласнога цэнтра. Заяву, а таксама відэазапіс ад яго, як даверанай асобы Яўгена Дудкіна, тады кандыдата ў дэпутаты, ён накіраваў у Кастрычніцкі РАУС Гародні.
Кажа Сяргей Верамеенка:
— Я падаў заяву ў Кастрычніцкі РАУС на тых двух маёраў, якія мяне выправадзілі супраць маёй волі, супраць закону, з выбарчага участка 18 лютага 2018 года падчас падліку галасоў. Я лічу, што іх дзеянні былі неправамернымі, неправамоцнымі антызаконнымі. Яны па-першае, не прадставіліся, не паведамілі мне,што я парушыў, які артыкул, якога закона, якога Кодэкса. І дзейнічалі яны наўпрост па загадзе старшыні камісіі, што даволі дзіўна.
Odtwarzacz plików dźwiękowych
Асноўная прычына выдалення Сяргея Верамеенкі была быццам бы яго недазволеная відэафіксацыя падліку галасоў выбарчай камісіяй. Наадварот, на думку Сяргея Верамеенкі — гэта не толькі права, але і абавязак даверанай асобы: пільнаваць празрысты падлік галасоў.
— Калі я з’яўляюся даверанай асобай кандыдата, значыцца я чалавек, якому людзі даручылі назіраць увесь працэс: наколькі ён будзе адкрытым і празрыстым. Я гэтага сказаць не магу. Ён быў не проста закрыты, ён яшчэ і нахаба быў парушаны, бо сам падлік галасоў прыпыняўся. Старшыня камісіі ўжо пасля закрыцця ўчасткаў дапусціла яшчэ адну асобу і гэта аказалася давераная асоба аднаго з праўладных кандыдатаў, на жаль, я не ведаю ягонага прозвішча, але гэта чалавек мяне штурхаў, спрабаваў вырваць у мяне планшэт.
Odtwarzacz plików dźwiękowych
Як паведаміла службовая асоба ў Кастрычніцкім РАУСе, адказ на заяву, Сяргей Верамеенка зможа атрымаць цягам дзесяці дзён.
— Тут не будзе перамогі справядлівасці, — мяркуе Сяргей Верамеенка. Але, для яго неабходна, каб дакументальная фіксацыя была для будучага разбіральніцтва, калі дойдзе час дэмакратыі ў Беларусі.
Якуб Сушчынскі, Беларускае Радыё Рацыя
