“Торвальд” быў. “Торвальд” будзе?
Знакаміты віцебскі арт-паб “Торвальд” абвясціў пра закрыццё з 11-га студзеня. На развітанне кавярня вырашыла правесці акцыю “Разбяры “Торвальд” на сувеніры” – прапанавала набыць за сімвалічныя грошы нешта з прадметаў інтэр’еру, посуду і гэтак далей.
Наведнікі адгукнуліся – хтосьці набываў сабе нешта на памяць, а нехта проста зайшоў, каб падтрымаць “Торвальд” і ўспомніць усё добрае, што з ім звязана:
– Кухня вельмі добрая! Малайцы! Нават вось у апошнія дні было ўсё так смачна прыгатавана, так прыгожа сервіравана…
– Тут адчуваецца гісторыя, тут так душэўна. І ўсё спрыяе таму, каб людзі адчулі сябе вальней.
– „Торвальд” вёў вялікую асветніцкую працу – тут выступалі Вайцюшкевіч, Шалкевіч, розныя лектары з цудоўнымі лекцыямі пра беларускую літаратуру, гісторыю… Тут вучыліся людзі шанаваць сваю краіну, свой горад родны.
Арт-паб “Торвальд” быў заснаваны 4 гады таму віцебскім мецэнатам, арганізатарам канцэртаў Віталём Броўкам.
З 2016-га году кавярня мясцілася ў будынку №1 па вуліцы Талстога. Грошы, атрыманыя з продажу сувеніраў, адміністрацыя “Торвальда” плануе выдаткаваць на рамонт, каб выканаць усе прадпісанні адмысловых службаў, якія прызналі памяшканне непрыдатным для працы. У сацыяльных сетках адміністрацыя ўстановы звярнулася да наведнікаў: “Як бы ўсё ні скончылася, верым, што ў кожным з нас застаецца часцінка „Торвальда”, якую мы заўжды носім з сабой. Так і менавіта так „Торвальд” быў, ёсць і абавязкова будзе”.
Беларускае Радыё Рацыя, Віцебск
