Трое хлопчыкаў са Светлагорска ўцяклі з дзіцячага садка ў Жлобін
Увечары 3 студзеня светлагорскую міліцыю паднялі па трывозе: з дзіцячага садка №21 сышлі тры хлопчыкі трох-чатырох гадоў, паведамляе светлагорскі сайт ranak.by.
Пра знікненне сваіх дзяцей бацькі даведаліся, калі пасля працы прыйшлі забіраць іх дадому. У каментары журналістам аператыўны дзяжурны службы міліцыі грамадскай бяспекі Светлагорскага РАУС Дзмітрый Ісаенка распавёў падрабязнасці: „Паведамленне ад аднаго з бацькоў пра тое, што, прыйшоўшы ў дзіцячы сад па трохгадовага сына, ён не знайшоў дзіцяці, паступіла ў 17:30. Адразу ж паступіла тэлефанаванне ад другога з бацькоў, які распавёў, што ў дашкольнай установе яго жонка таксама не змагла знайсці дзіцяці”.
Хлопчыкаў шукалі супрацоўнікі інспекцыі па справах непаўналетніх, следча-аператыўнай групы, крымінальнага вышуку, а таксама асабісты склад РАУС.
У 18:11 светлагорскія міліцыянты атрымалі звесткі, што дзяцей знайшлі. У дызель-цягніку, які ішоў да Жлобіна, каля станцыі Мормаль супрацоўнікі міліцыі пабачылі трох хлопчыкаў без суправаджэння дарослых. Яны суправадзілі дзяцей да Жлобіна і даставілі ў лінейны аддзел міліцыі. Жлобінскія міліцыянты даслалі фотаздымкі хлопчыкаў светлагорскім калегам, і бацькі пацвердзілі, што гэта менавіта збеглыя дзеці.
Хлопчыкаў вярнулі са Жлобіна ў той жа вечар.
Цяпер па факце здарэння ідзе праверка, каб высветліць, чаму дзеці змаглі самі сысці з садка.
Фота: ranak.by
Глядзіце таксама
