Апытанне пінчукоў: Ці магчыма змяніць сітуацыю ў краіне праз пратэсты?
У Беларусі трывае шосты тыдзень паслявыбарчых пратэстаў. Па ўсёй краіне людзі ў розных формах выказваюць свой недавер дзеючай уладзе і патрабуюць перавыбараў. Штонядзелю ладзяцца шматтысячныя маршы прыхільнікаў перамен і не толькі ў Менску.
Наш карэспандэнт пацікавіўся ў мінакоў на вуліцах Пінска: “Ці магчыма змяніць сітуацыю ў краіне праз пратэсты?”:
– Я лічу, што можна.
– Гэта вельмі цяжкае пытанне. Пакуль большасць народу не выйдзе на пратэсты. Думаю, не.
– Ну ў свеце рэжымы мяняюць.
– Я думаю, канешне, можна. У прынцыпе, з дапамогай мяккай сілы мяняліся і не такія рэжымы.
– Я не ўпэўнена. Таму што я ўжо заблыталася. Што будзе затым, гэта мяне пужае яшчэ больш.
– Пры гэтай сітуацыі, магчыма, так.
– Наогул я да гэтага стаўлюся адмоўна. Таму ні да чаго гэта. Змаганне гэтае ні да чаго.
– Гэта залежыць ад актыўнасці людзей. Ад масавасці пратэсту.
Усё больш палітычных экспертаў схіляецца да таго, што пратэсты ў Беларусі будуць адбывацца да інагурацыі Лукашэнкі і гэтая падзея можа стаць кульмінацыйнай, пасля чаго будзе бачна, чым можа скончыцца палітычны крызіс у краіне.
Беларускае Радыё Рацыя
Фота: 1pinsk.by
