Ці з’явіцца ў Гародні пакой “Бацькоў і дзетак”?
Пакой “Бацькоў і дзетак” пакуль у Гародні не з’явіцца. На запыт гарадзенца Ігара Банцара, які хоча зрабіць на беларускіх вакзалах пакой “Бацькоў і дзетак” замест існуючых пакояў “Маці і дзіцяці”, адказалі з Міністэрства працы і сацыяльнай абароны.
Гісторыя пачалася амаль месяц таму, калі грамадскі актывіст звярнуўся з запытам у Міністэрства транспарту і вырашыў змяніць гендэрную памылку. Ліст перанакіравалі ў іншае міністэрства.
Кажа Ігар Банцар:
– Лік у футбольным матчы паміж Міністэрствам транспарту і Міністэрствам працы стаў роўным – 1:1. Міністэрства працы адкінула мой зварот у Міністэрства транспарту са словамі, што ўзнятае мной пытанне не ў іх кампетэнцыі. Цяпер чакаем рэакцыі Міністэрства транспарту. Не здзіўлюся, калі яно ўвядзе новага гульца. Напрыклад, Міністэрства прамысловасці ці сельскай гаспадаркі, каб паказаць сваю бурную дзейнасць.
Гарадзенец не збіраецца прыпыняць ліставанне і будзе дабівацца гендэрнай роўнасці законным шляхам.
Беларускае Радыё Рацыя, Гародня
