Ці з’явіцца ў Гомелі беларускамоўны дзіцячы садок?
Гомельскі гарвыканкам адказаў на зварот грамадскасці адносна неабходнасці адкрыцця цалкам беларускамоўнага дзіцячага садочка. З дакумента вынікае, што па хадайніцтве гарадскога аддзела адукацыі ў службе „Адно акно” пры пастаноўцы на ўлік дашкалятаў, будзе ўносіцца інфармацыя пра мову навучання. Мяркуецца, што такі падыход дазволіць фармаваць беларускамоўныя групы. Апроч таго, мясцовыя ўлады абяцаюць адкрыццё дадатковых груп. Кіраўнік Гомельскай гарадской філіі Таварыства Беларускай Мовы імя Францішка Скарыны Алеся Аўласевіч адзначае, што ў адказе мала канкрэтыкі.
– Каб адразу не казаць пра нешта негатыўнае, а гэтым негатыўным, як звычайна, ва ўсіх гэтых адказах чыноўнікаў ёсць тое, што яны пішуць пра наяўнасць дзвюх моў, што яны нічога не парушаюць. У нас ёсць бацькі, якія не хочуць. Але цікава, што ў гэтым лісце напісана, што будзе адкрыта дадатковая група ў садку №160 і №161. Зноў мы вяртаемся да выніку мінулага года, калі нам паабяцалі дадатковыя групы. Пачнем з дадатковых груп, а далей ужо вырашаем, што рабіць.
У пачатку кастрычніка Гомельская філія ТБМ і Гомельскі Дэмакратычны Форум накіравалі зварот ў гарвыканкам з патрабаваннем адкрыць у Гомелі дзіцячы садок з беларускай мовай навучання. Актывісты спасылаліся на артыкулы Канстытуцыі і Закон „Аб мовах”.
Беларускае Радыё Рацыя, Гомель
Глядзіце таксама
