У 2018 годзе колькасць насельніцтва скарацілася ў 107 са 118 раёнаў
У 2018 годзе колькасць насельніцтва знізілася ў 90% раёнаў Беларусі, сведчаць афіцыйныя статзвесткі.
У Менскай вобласці насельніцтва паводле вынікаў года павялічылася толькі ў 5 з 22 раёнаў (Менскім, Смалявіцкім, Дзяржынскім, Уздзенскім, Лагойскім).
У Гомельскай вобласці колькасць насельніцтва павялічылася ў абласным цэнтры, у аднайменным раёне, а таксама ў Мазырскім і Веткаўскім (на 48 чалавек) раёнах. У астатніх 18 раёнах Гомельскай вобласці насельніцтва скарацілася.
У Гарадзенскай вобласці вырасла колькасць жыхароў абласнога цэнтра, аднак амаль ва ўсіх раёнах (у 20 з 21) насельніцтва змяншалася. Адзінае выключэнне — Астравецкі раён, на тэрыторыі якога будуецца атамная электрастанцыя.
У Магілёўскай і Берасцейскай абласцях вырасла колькасць насельніцтва ў абодвух абласных цэнтрах і ў аднайменных раёнах, а ў астатніх раёнах — зменшылася. У Берасцейскай вобласці у 2018 годзе насельніцтва скарацілася ў 15 з 16 раёнаў, у Магілёўскай — у 20 з 21. У Віцебскай вобласці насельніцтва павялічылася толькі ў абласным цэнтры, а ва ўсіх раёнах — скарацілася.
Змяншэнне колькасці насельніцтва ў Беларусі звязанае са скарачэннем колькасці жанчын рэпрадуктыўнага ўзросту, заявіла міністр працы і сацыяльнай абароны Ірына Касцевіч на прэс-канферэнцыі ў студзені. „Рэпрадуктыўнага ўзросту дасягае зараз тая малалікая кагорта грамадзян, якія нарадзіліся ў 1990-х гадах”, — канстатавала яна. Як следства, адзначыла чыноўнік, колькасць дзяцей на адну жанчыну змяншаецца.
У сваю чаргу незалежныя эксперты лічаць, што насельніцтва ў раёнах змяншаецца не толькі з-за дэмаграфічных, але і з-за эканамічных прычын — рынак працы ў раёнах становіцца малапрывабным.
„Людзі прыцягваюцца ў рэгіёны са спрыяльным эканамічным асяроддзем, і туды пераязджаюць маладыя людзі, самая мабільная частка насельніцтва, што стымулюе нараджальнасць. У рэгіёны, дзе няма прывабных умоў для працы, мала хто паедзе”, — адзначыла ў каментары БелаПАН акадэмічны дырэктар Беларускага эканамічнага даследча-адукацыйнага цэнтра (BEROC) Кацярына Барнукова.
Верагоднасць, што неспрыяльныя дэмаграфічныя тэндэнцыі ў большасці раёнаў удасца развярнуць назад, даволі малая, лічаць эксперты. Урбанізацыя — глабальны трэнд, і яму складана супрацьстаяць, лічыць старшы навуковы супрацоўнік BEROC Леў Львоўскі. „У Мінску ўжо жыве больш за 20% насельніцтва краіны, жыхары тут багацейшыя. Таму людзі пераязджаюць з раёнаў жыць альбо ў сталіцу, альбо ў абласныя цэнтры, дзе ўзровень жыцця таксама вышэйшы, чым на перыферыі”, — падкрэсліў ён у каментары БелаПАН.
