У актывіста “Гародні” міліцыянты хочуць узяць тлумачэнні
Па крымінальным артыкуле гарадзенскія міліцыянты спрабавалі ўзяць тлумачэнні ў сябра прафсаюза РЭП Анатоля Мышкевіча.
Ён – адзін з сябраў ініцыятывы „Гародня” дамагаўся паляпшэння правоў работнікаў аўтобуснага парку № 1 Гародні. Патрэба ў дапамозе вадзіцелям стала відавочнай пасля трагічнага факту, калі шафёр з роспачы скочыў з моста ў Нёман. На думку Анатоля Мышкевіча, адміністрацыя аўтапарку за абарону правоў працоўных спрабавала адпомсціць. Падставай стала тое, што маці аднаго з вадзіцеляў аўтапарку напісала заяву ў міліцыю, у якой вінаваціць Анатоля Мышкевіча ў паклёпе на яе. Маўляў, ён падаў ва ўласнай публікацыі яе ўзрост памылкова.
Кажа Анатоль Мышкевіч:
– Тэлефанавалі, сказалі, што мяне трэба ізноў апытаць. Таму што яны гэтую справу вядуць як праверку па крымінальнай справе. Таму што паклёп у інтэрнэце – гэта крымінальны артыкул. На маю думку, гэта спроба аказаць нейкі ціск і крыху папсаваць нервы. На мой погляд, ніякай будучыні ў гэтай справы няма.
Анатоль Мышкевіч адмовіўся даваць паказанні на апытанне па крымінальным артыкуле 188 пункт 2, спаслаўшыся на Канстытуцыю краіны.
Вынікам праўнай падтрымкі кіроўцаў аўтобуснага парку № 1, стала падвышэнне заробку, паляпшэнне умоў працы. Але, як заўважае грамадскі актывіст, яны не гатовыя былі адстойваць свае правы да канца. Таму меры былі палавіністыя.
Якуб Сушчынскі, Беларускае Радыё Рацыя, Гародня
Глядзіце таксама
