У арыштаваных расейскіх хакераў у Чэхіі знайшлі 8 мільёнаў еўра

У грамадзян Расеі і В’етнама, якіх арыштавалі ў Чэхіі па справе злому кампутарнай сістэмы МЗС Чэхіі і якіх вінавацяць ва ўмяшанні ў працу сістэмы выдачы відаў на жыхарства, у час ператрусаў забралі каля 200 мільёнаў крон (каля 7,7 мільёна еўра) наяўнымі. Пра гэта паведаміла Radio Praha са спасылкай на Нацыянальны цэнтр барацьбы з арганізаваным злачынствам.

У абвінавачаных арыштавалі таксама аўтамабілі і нерухомасць на агульную суму 70 мільёнаў крон (каля 2,7 мільёна еўра).

Пра затрыманне васьмі чалавек, сярод якіх былі расейцы, стала вядома 16 кастрычніка. Іх арыштавалі яшчэ ў сярэдзіне верасня і высунулі абвінавачванні таксама ў адмыванні грошай. З-за хакерскай атакі, у якой падазраваюць расейцаў і в’етнамцаў, адбыліся збоі ў працы сістэмы па прыёме заяваў на від на жыхарства ў Чэхіі. Падазраваныя ў выніку хакерскай атакі маглі зарабіць некалькі мільёнаў еўра.

Беларускае Радыё Рацыя