У Беларусі 21.101 пацверджаны выпадак COVID-19
Колькасць пацверджаных выпадкаў каронавіруснай інфекцыі COVID-19 у Беларусі дасягнула 21.101 (8,7% ад колькасці праведзеных тэстаў), памёр 121 чалавек, паведаміла Міністэрства аховы здароўя ў сваім тэлеграм-канале.
Такім чынам, за апошнія суткі памерлі яшчэ пяць чалавек, а агульная колькасць пацверджаных выпадкаў COVID-19 павялічылася на 933 (+4,6%) (у папярэднія суткі 913 новых выпадкаў і чатыры смерці). Міністэрства аховы здароўя традыцыйна падкрэслівае, што пацыенты памерлі „з шэрагам хранічных захворванняў з выяўленай каранавіруснай інфекцыяй”.
Ачунялі і выпісаныя 5.484 пацыенты (+417 за суткі). Усяго праведзена 240.146 тэстаў.
Міністэрства аховы здароўя зноў не апублікавала статыстыку хворых па абласцях і Мінску, а таксама колькасць хворых, якія знаходзяцца на апаратах штучнай вентыляцыі лёгкіх, і пацыентаў, якія маюць патрэбу „ў асаблівай увазе спецыялістаў у сувязі з цяжарам захворвання”.
Аляксандр Лукашэнка 8 мая заявіў журналістам: „Калі мы і далей будзем ісці абраным шляхам, мы абавязкова праз месяц забудзем пра каронавірус”. Ён выказаў упэўненасць у тым, „што ў Беларусі здолеюць перамагчы каронавірус, у тым ліку і з Божай дапамогай”. „Думаю, Гасподзь дапаможа пераадолець па ўсёй краіне гэтыя няшчасці і напасці”, — заявіў кіраўнік дзяржавы.
Лукашэнка ўпэўнены ў правільнасці абранага краінай шляху ў барацьбе з распаўсюджваннем інфекцыі: „Мы абралі свой шлях. І я перакананы сёння, што мы паступілі правільна. Мы не ўвялі надзвычайнае становішча”. Ён дадаў, што галоўнае — гэта выратаванне жыцця людзей. „Мы павінны змагацца за кожнага чалавека, і мы ўмеем гэта рабіць”, — сказаў Лукашэнка.
5 мая ён заявіў, што прагноз айчынных спецыялістаў наконт эпідсітуацыі ў краіне „пакуль спраўджваецца з дзіўнай дакладнасцю”.
У той жа дзень у эфіры тэлеканала „Беларусь 1” намеснік галоўнага ўрача Рэспубліканскага цэнтра гігіены, эпідэміялогіі і грамадскага здароўя Ірына Глінская выказала меркаванне, што выйсці на ўстойлівае зніжэнне захворвання на каронавірус COVID-19 у Беларусі атрымаецца прыкладна праз месяц. Такой ацэнкай яна падзялілася ў адказ на пытанне, на які прагноз спецыялістаў спасылаецца Лукашэнка. „Мы зрабілі гэты прагноз. Улічвалася эпідэміялагічная мадэль, удзельнічалі ў яе распрацоўцы розныя спецыялісты, таму што гэта пытанне знаходзіцца на стыку спецыяльнасцяў — у сферы працы эпідэміёлагаў, вірусолагаў, інфекцыяністаў. Улічвалі зусім розныя параметры: сярэдні інкубацыйны перыяд каронавіруса, розныя мадэлі, як можа развівацца сітуацыя. І, безумоўна, улічвалі і нейкія пэўныя сацыяльныя асаблівасці, разумеючы, што ў тыя ж выхадныя дні рэкамендацыі Міністэрства аховы здароўя па сацыяльным дыстанцыяванні насельніцтва не так дакладна выконвае, як у рабочыя дні”, — патлумачыла Глінская.
„І вось гэты прагноз, уласна кажучы, вось за той перыяд з моманту яго стварэння, ён практычна ў поўнай меры апраўдваецца. Ну, можа быць, недзе апошнія тыдні паўтара крыху ў нас з’явіўся па прагнозе зрух на адзін дзень. Тыя меры, якія мы прымаем, яны досыць эфектыўныя, яны працуюць і дазваляюць нам папярэдзіць досыць вялікую колькасць выпадкаў захворвання, не дапусціць лавінападобнага росту”, — заявіла прадстаўнік цэнтра.
Адказваючы на пытанне, калі Беларусь па колькасці заражаных COVID-19 выйдзе на „тое самае плато і лічбы ўсё ж пачнуць паволі ісці на змяншэнне”, Глінская сказала: „Мяркуем, што дзесьці праз месяц, магчыма, нават да канца гэтага месяца, мы ўсё ж такі выйдзем на ўстойлівае зніжэнне захворвання і тады ўжо можна будзе казаць пра нейкія наступныя прагнозы”.
Фота: МН
Глядзіце таксама
