У Беларусі зарэгістраваны першы выпадак тэлефоннага флуду
На тэрыторыі Беларусі ўпершыню афіцыйна зарэгістраваны выпадак тэлефоннага флуду. Такая інфармацыя прагучала ўвечары 29 жніўня ў праграме „ЧП.by” на тэлеканале „НТВ-Беларусь”.
У міліцыю звярнуўся ўладальнік фірмы па рэалізацыі электратранспарту, калі высветлілася, што да іх не могуць датэлефанавацца кліенты. Пры гэтым за кароткі прамежак часу на тэлефоны фірмы паступіла каля 600 званкоў з неўстаноўленых нумароў. Зносіны з кліентамі былі паралізаваныя.
Пасля звароту ў міліцыю стала вядома, што званкі паступалі ад двух мінчан, якія таксама прадавалі праз інтэрнэт электратранспарт. Сваімі дзеяннямі яны спрабавалі падарваць аўтарытэт канкурэнтаў.
Як распавёў у інтэрв’ю „ЧП.by” начальнік упраўлення па раскрыцці злачынстваў у сферы высокіх тэхналогій ГУУС Мінгарвыканкама Андрэй Кавалёў, тэлефонны флуд (струмень) — гэта элементарная DDOS-атака, толькі ў фармаце GSM. „У залежнасці ад тэхнічных налад, ад мэты зламыснік настройвае пэўную шкодную праграму і можа рабіць нават штосекундныя званкі на пэўны абаненцкі нумар аператара сотавай сувязі. У арганізацыі перастаюць нармальна працаваць усе тэлефоны — GSM, стацыянарныя, міні-АТС”, — растлумачыў спецыяліст.
Для Беларусі і Менска гэта першы зварот у міліцыю аб падобным факце, сказаў Кавалёў. Пры гэтым ён не выключае, што такія факты ўжо былі, але заяў у міліцыю пра іх няма. Магчыма, грамадзяне не ведалі пра ўчыненае ў дачыненні да іх злачынства, выказаў здагадку спецыяліст.
Паводле яго слоў, такая з’ява даволі распаўсюджаная ў Расеі і іншых краінах СНД у канкурэнтнай барацьбе.
Дзеянні зламыснікаў, як мяркуе прадстаўнік ГУУС (бо няма судовай практыкі), могуць падпадаць пад ч. 1 арт. 351 КК (камп’ютарны сабатаж) і арт. 354 КК (выкарыстанне шкоднага праграмнага забеспячэння).
