У Беларусі знік украінскі хлопец? (абноўлена)
Амбасада Украіны ў Менску накіравала ноту ў міністэрства замежных спраў Беларусі з мэтай высветліць месцазнаходжанне 19-гадовага Паўла Грыба. Пра гэта „Украинской правде” заявіў супрацоўнік пасольства.
Менск не атрымліваў ад Украіны ноту пра прапаўшага ў Беларусі ўкраінца Паўла Грыба. Пра гэта паведаміў афіцыйны прадстаўнік міністэрства замежных спраў Беларусі Дзмітрый Мірочын у каментары карэспандэнту „ВВС Україна”.
***
У Беларусі знік 19-гадовы сын дарадцы галавы Сінадальнага ўпраўлення ваеннага духавенства Украінскай праваслаўнай царквы Кіеўскага патрыярхату, афіцэра запасу Ігара Грыба – Павел Грыб. Пра гэта бацька паведаміў на сваёй старонцы ў фэйсбуку.
Ігар Грыб падазравае, што яго сына выкрала ФСБ Расеі.
„24 жніўня 2017 года мой сын Павел (19 гадоў) паехаў у горад Гомель на сустрэчу з дзяўчынай, з якой пазнаёміўся і кантактаваў толькі ў сацыяльных сетках”, – напісаў Грыб.
Паводле ягоных слоў, дзяўчына павінна была прыехаць на сустрэчу з Расейскай федэрацыі. Па дамоўленасці, Павел павінен быў вярнуцца ў той жа дзень. Аднак ён не вярнуўся дамоў і на наступны дзень, пасля гэтага бацька паехаў у Гомель на пошукі сына.
„І там я высветліў, што Павел знаходзіцца ў вышуку паводле артыкулу 205 КК РФ (тэрарыстычны акт), ініцыятарам з’яўляецца ФСБ РФ па Краснадарскім краі горада Сочы”, – напісаў Грыб.
У Гомельскай памежнай групе Грыбу заявілі, што не маюць ніякай інфармацыі пра яго сына.
„Мне перадалі, што ніякай інфармацыі пра сына памежнікі не маюць, што ёсць відавочнай хлуснёй! І сустракацца са мной памежнае кіраўніцтва адмовілася. Такім чынам, стала зразумела, што ФСБ выманіла Паўла ў Гомель пад выглядам сустрэчы з дзяўчынай і правяла затрыманне”, – напісаў Грыб.
Паводле яго словаў, пасля пачатку ваеннай агрэсіі Расеі супраць Украіны Павел быў актыўным карыстальнікам сацсетак і „часта не выбіраў выразы адносна ворагаў Радзімы”. „Магчыма, гэта і стала нагодай правакацыйных дзеянняў ФСБ РФ”, – лічыць Грыб.
Ён таксама дадаў, што ўдзелу ў баявых дзеяннях на ўсходзе Ўкраіны Павел не браў, а служыць у сілавых структурах па стане здароўя не можа, паколькі ў яго інваліднасць. Хлопец цэлы час павінен прымаць падтрымліваючыя прэпараты. Бацька напісаў, што брак лекаў можа прывесці да фатальных наступстваў.
Іншай інфармацыі пра прапаўшага Паўла Грыба пакуль няма.
Беларускае Радыё Рацыя
