Каталікі збіраюць сродкі на дапамогу ўкраінцам (абноўлена)
Каталікі Беларусі далучыліся да еўрапейскай акцыі па зборы сродкаў для пацярпелых ва Украіне. Гэтая акцыя праходзіць з закліку Папы Францішка ва ўсіх каталіцкіх касцёлах Еўропы. Пацярпелым ад вайны ва ўсходняй Украіне грошы ахвяравалі таксама гарадзенскія грэка-каталікі.
Кажа святар Беларускай Грэка-Каталіцкай Царквы айцец Андрэй Крот:
– Безумоўна, гэта наша хрысціянская міласэрнасць і дапамога тым людзям, якія маюць патрэбу. Бо вайна, нягледзячы на тое, хто ў ёй правы і хто вінаваты, гэтага не разбірае. І людзі церпяць ад гэтага. У кагосьці згарэў дом, бізнес, сродкі на ўтрыманне.
Мы збіраем грошы тым людзям, якія не маюць за што адрамантаваць ці пабудаваць новы дом, не маюць за што есці ці апрануцца.
У свята Божай Міласэрнасці Папа Францішак заклікаў вернікаў правесці гэты збор ахвяраванняў менавіта 24-га красавіка.
* * *
24 красавіка ў Беластоку збіраюць сродкі на дапамогу ахвярам вайны ва Украіне. Падобныя зборы, паводле парады Папы Францішка, адбываюцца ва ўсіх касцёлах Еўропы. Да акцыі далучаюцца таксама ўсе парафіі Беластоцкай архі-дыяцэзіі.
Папа Францішак у адмысловым лісце падкрэслівае, што з прычыны вайны ва Украіне каля мільёна чалавек былі вымушаныя пакінуць свае дамы, сярод іх – асобы сталага веку і дзеці.
Акцыя таксама мае звярнуць увагу на ўсходнюю частку Еўропы і выявіць салідарнасць з ахвярамі вайны.
Беларускае Радыё Рацыя
Фота fakt.pl
