У Гародні хочуць ліквідаваць грамадскае аб’яднанне „Трэці Сектар”
Прызначаная дата суда па ліквідацыі аднаго з найстарэйшых гарадзенскіх грамадскіх аб’яднанняў Беларусі – Цэнтра «Трэці сектар». Пасяджэнне пройдзе 3 верасня. Пра гэта арганізацыя паведаміла ў Facebook.
Раней, у ліпені, Мінюст пачаў пазапланавую праверку ў аб’яднанні, а пазней у яго офісе быў праведзены ператрус – прычым пры адсутнасці прадстаўнікоў арганізацыі. Кіраўнік «Трэцяга сектару” Вітаўт Руднік разам з жонкай Ланой Руднік (заснавальніцай «Студыі карысных кампетэнцый» якую таксама ліквідуюць) на той момант знаходзіліся за мяжой і застаюцца там да гэтага часу.
«Трэці сектар» быў заснаваны ў 1997 годзе. Ён займаецца інфармацыйнай падтрымкай грамадскіх ініцыятыў, грамадскай адукацыяй у сферы журналістыкі, развіццём лакальных супольнасцяў і сацыяльнай анімацыі, праектамі ў сферы культуры і спадчыны, развіццём трансгранічнага супрацоўніцтва паміж НКО. Сярод яго праектаў таксама «Універсітэт Залатога Веку», накіраваны на інтэлектуальную, сацыяльную і фізічную актывізацыю людзей сталага ўзросту.
