У Гародні набіраюць першыя беларускія класы
Гарадзенцы маюць магчымасць падаць заявы для сваіх дзяцей, якія ідуць у першы клас, для навучання па-беларуску.
Цяпер колькасць заяваў у першы беларускі клас у СШ №32 – пяць чалавек, а у СШ №34 – адна заява. Таварыства Беларускай мовы заклікае бацькоў праявіць патрыятызм і аддаць сваіх дзетак на беларускае навучанне. Заявы за навучанне па-беларуску бацькі могуць падаваць яшчэ два месяцы.
Кажа намеснік старшыні абласной Рады ТБМ Алесь Крой:
– У нас у горадзе пражывае больш за 350 тысяч жыхароў. 120 тысяч з якіх, падчас апошняга перапісу насельніцтва 2009 года, сказалі, што для іх беларуская мова родная. Таксама 23 тысячы гарадзенцаў, па перапісу 2009 года, размаўляюць у Гародні штодня па-беларуску. Гэта вялікія лічбы. На жаль, лічба, якая паказвае, колькі дзяцей вучыцца ў беларускіх класах, не адпавядае папярэднім лічбам.
Агулам у Гародні цяпер навучаецца па-беларуску ўсяго шэсць дзясяткаў дзяцей. Абласная арганізацыя Таварыства Беларускай мовы шукае моладзь, якая ўключылася б у працу арганізацыі, бо працы шмат – валанцёраў бракуе.
Якуб Сушчынскі, Беларускае Радыё Рацыя
