У Гародні пройдзе “Шалёнае чаяванне”
13 ліпеня ў Гародні паставяць “Шалёнае чаяванне” па матывах кнігі Льюіса Кэрала «Аліса ў Краіне Цудаў”. Летняя кавярня „Канюшына” сумесна з творчымі людзьмі горада ў падтрымку Цэнтра ПОРА прадставяць сцэну з гэтага твора.
Падчас мерапрыемства жыхары горада не толькі ўбачаць і пагутараць з персанажамі кнігі – Капялюшнікам, Чырвонай Каралевай і іншымі, у якіх пераўвасобяцца артысты, але і змогуць на хвіліну апынуцца там, дзе знікае час.
Пра будучыю акцыю распавядае дырэктарка дабрачыннай установы Цэнтр ПОРА Ганна Ждановіч:
– Мэтай нашага “Шалёнага чаявання” з’яўляецца прыцягненне ўвагі да праблем людзей, якія сутыкнуліся з анкалогіяй. Чаму менавіта праз чаяванне? У творы ўздымаецца пытанне часу. Час – гэта адзін з тых найважнейшых фактараў, які ў анкалогіі мае асаблівае значэнне. Таму мы прапаноўваем гарадзенцам падумаць пра час, пра жыццё, на хвілінку спыніцца і паўдзельнічаць у дабрачынным мерапрыемстве.
Тэатральнае шоу у цэнтры Гародні для жыхароў горада будуць ствараць “Творчая лабараторыя 2 Е”, Фрык-тэатр “Гексаген”, Тэатр агню «ERGO BIBAMUS », Міхаіл Rai.
Беларускае Радыё Рацыя, Гародня
