У Гародні судзілі Паўла Мажэйку
Агучаны прысуд па справе вядомага гарадзенца – Паўла Мажэйкі. Працэс адбываўся ў Ленінскім раённым судзе, справу разглядала суддзя Алена Пятрова.
Паўла Мажэйку абвінавацілі ў працы на замежны СМІ без акрэдытацыі, і ў незаконным вырабе і распаўсюдзе інфармацыі. Прысуд – 23 базавыя велічыні штрафу, а гэта 529 беларускіх рублёў.
* * *
Працэс адбываецца ў Ленінскім раённым судзе, справу разглядае суддзя Алена Пятрова.
Паўла Мажэйку абвінавачваюць у працы на замежны СМІ без акрэдытацыі і ў незаконным вырабе і распаўсюдзе інфармацыі. За працэсам сочыць наш карэспандэнт Якуб Сушчынскі:
– Гісторыя сягае 25-га сакавіка, калі Павел Мажэйка ў Дзень Волі на дазволеным мітынгу ў Гародні праводзіў каментаванне. Адной з падстаў яго абвінавачвання з’яўляецца тое, што суддзя Алена Пятрова лічыць, што Павел Мажэйка нібыта вырабляў інфармацыю. З гэтым ён непагаджаецца, ён кажа, што толькі рабіў каментары. Сапраўды гэта было чуваць, што ён там кажа некаторыя словы. Яго таксама абурае ў судовым працэсе, што фотаздымкі, якія ён размясціў у Твітэры, што пазней з’явіліся на канале “Белсат”, сталі падставай абвінавачвання яго ў тым, што ён нібыты рабіў іх спецыяльна для канала. Гэта не даказана, таму цяпер Павел Мажэйка патрабуе, каб суд давёў яго працу на канал “Белсат”, але зразумела, што відавочных доказаў няма. Суддзя Алена Пятрова абвясціла перапынак.
Беларускае Радыё Рацыя, Гародня
