У Гародні з’явяцца інфармацыйныя стэнды
У гістарычным цэнтры Гародні з’явяцца інфармацыйна-турыстычныя стэнды. Яны будуць знаёміць гасцей горада з гістарычнымі аб’ектамі і дэманстраваць іх першасны выгляд.
Пачаткова мае з’явіцца каля паўсотні такіх стэндаў, у тым ліку на вуліцы Замкавай, у Каложскім парку, на плошчы Савецкай ды ў іншых месцах. Гэта адзін з напрамкаў дзейнасці па стварэнні спрыяльных умоў для замежных турыстаў, якія наведваюць Гародню ў межах бязвізавага руху.
Пры гэтым, на думку выкладчыка Гарадзенскага купалаўскага ўніверсітэта Янкі Трацяка, на прыток турыстаў у значнай ступені ўплывае імідж краіны:
– Нават калі помнікі паставім у Гародні, турыст не пойдзе. Узнікае пытанне: чаму? Шмат ад чаго залежыць, як кажуць, унутраныя і знешнія фактары вельмі моцна ўплываюць. Можа быць тут такі фактар эканамічны яшчэ вельмі моцна ўплывае, палітычны дзесьці. Гэта ўсё збіраецца ў адно, і на выхадзе мы маем тое, што называецца іміджам.
Пяцідзённы бязвізавы ўезд для замежнікаў дзейнічае ў рэгіёне Аўгустоўскага канала з 26 кастрычніка мінулага года. За гэты час Гародню і ваколіцы наведалі некалькі тысяч бязвізавых турыстаў. На думку Янкі Трацяка, Гародні варта задумацца пра так званы “рэкрэацыйны турызм”, хоць для гэтага таксама яшчэ не хапае патрэбнай інфраструктуры.
Беларускае Радыё Рацыя
