У Глыбокім судзілі Змітра Лупача
У Глыбокім адбыўся суд над Змітром Лупачам за супрацу з тэлеканалам “Белсат” без акрэдытацыі. Але гэтым разам штраф незалежнаму журналісту не прысудзілі, бо справу суддзя Станіслаў Трапук адправіў у міліцыю на дапрацоўку. Як сказаў суддзя, па прычыне немагчымай устаноўкі дакладнай даты адміністрацыйнага правапарушэння.
Як кажа незалежны журналіст Зміцер Лупач, у яго было спадзяванне на тое, што суд 27 студзеня скончыцца менавіта так:
– Надзея была, бо ведаючы, хто будзе судзіць, і прачытаўшы рапарт, ведаў, што дата дакладна не тая. Бо я ў пятніцу пазнаёміўся са справай.
Падчас працэсу незалежны журналіст падаваў шмат хадайніцтваў, частка з якіх была задаволеная судом, у тым ліку выклікаць як сведку праваабаронцу Паўла Левінава. Хоць на пачатку было адхілена хадайніцтва, каб ён прадстаўляў інтарэсы Змітра як спецыяліст.
Кажа Павел Левінаў:
– Выступаючы ў якасці сведкі, я выклаў пазіцыю нормаў права, але больш за ўсё мяне ўразіла рэпліка суддзі, што, аказваецца, не ён вырашае гэтыя справы, а паказаў пальцам уверх – вырашаюць “наверсе”, а тут толькі выконваюць. Таму, каб пачуць такое прызнанне, няхай і па-за межамі судовага пасяджэння, дзеля гэтага варта было прыехаць.
На суд былі выкліканыя і пенсіянеркі з мястэчка Падсвілле, якія трапілі ў сюжэт “Белсата” і скардзіліся журналісту на праблемы з утрыманнем свайго дома мясцовай ЖКГ.
Яны не вельмі добра пачувалі сябе ў судзе, нават некаторым рабілася блага. Ім было складана зразумець, чаму судзяць за праўду журналіста.
Таксама Змітра Лупача прыехалі падтрымаць праваабаронцы з Віцебска і прыйшлі мясцовыя журналісты.
Цалкам матэрыял слухайце ў далучаным файле:
Таццяна Смоткіна, Беларускае Радыё Рацыя
Глядзіце таксама
