У Курапатах асвяцілі новую алею крыжоў
Новую алею крыжоў асвяцілі 29-га кастрычніка ва ўрочышчы Курапаты – месцы масавых пахаванняў ахвяраў сталінскіх рэпрэсій. Актывісты з бел-чырвона-белымі сцягамі, а таксама знічамі і сцягам Украіны адкрылі новую алею з сямі крыжоў у заходняй частцы мемарыялу. У гэтым месцы раней быў лес, які актывісты прывялі ў парадак. Як адзначыла актывістка Ініцыятывы за «Уратаванне Курапатаў» Ганна Шапуцька, мерапрыемства прайшло спакойна, нават не было, як звычайна, так званых “людзей у цывільным”:
– Хацелася б, каб было больш людзей. Бо было іх няшмат – чалавек 25. Але будуць 2-га чысла Дзяды, таму спадзяемся, што на гэта мерапрыемства збярэцца больш людзей. Але ж спадзяюся, што кожны, хто не змог прыехаць, у думках падумаў пра ахвяр таго рэжыму і па-свойму ўшанаваў памяць пра іх ці знічом, ці проста малітвай.
Новую алею крыжоў ва ўрочышчы Курапаты асвяціў праваслаўны святар Аляксандр Шрамко. Памятнае мерапрыемства завершылася выкананнем гімна “Магутны Божа”.
Сёння, 30 кастрычніка, спаўняецца 26 гадоў з часу першага масавага шэсця ў Курапаты, якое адбылося ў 1988 годзе з нагоды Дня памяці продкаў – Дзяды.
Яна Запольская, Беларускае Радыё Рацыя
Фота з facebook Ганны Шапуцькі
Глядзіце таксама
