У Курапатах высаджваюць дрэвы
Пра гэта паведаміў у фэйсбуку сустаршыня Беларускай хрысціянскай дэмакратыі Павел Севярынец.
Як заўжды ў сераду, падчас Курапацкай варты БХД, Павел Севярынец прыйшоў у Курапаты і з боку Крыжа Пакутаў убачыў нацягнуты шпагат і мноства выкапаных ямінаў уздоўж яго. Каля месца правядзення прац знаходзілася некалькі супрацоўнікаў Бараўлянскага спецлясгасу, а таксама асобы ў цывільным.
Таксама на месцы прысутнічаў дырэктар Бараўлянскага спецлясгасу Аляксандр Мірановіч.
«Тут вядуцца лесагаспадарчыя працы ў адпаведнасці з дзеючым Лясным кодэксам Рэспублікі Беларусь», — сказаў ён, адмовіўшыся канкрэтызаваць характар прац.
Фота: скрыншот з відэа
Супрацоўнік Інстытута гісторыі НАН Кенько, які сачыў за тым, каб раскапаныя яміны не закранулі пахаванні, распавёў, што ва ўрочышчы плануецца «пасадка зялёных насаджэнняў — вербаў і клёнаў».
На заўвагу Паўла Севярынца пра тое, што грамадскасць не папярэдзілі пра маючыя адбыцца працы, гісторык сказаў, што ім таксама паведамілі пра гэта толькі ўчора.
Апроч Мірановіча, у Курапатах прысутнічалі супрацоўнікі Бараўлянскага лясніцтва Іосіф Савіцкі (ляснічы) і Віталь Керней (памочнік ляснічага).
Павел Севярынец заклікаў прыехаць у Курапаты назіральнікаў.
Тым часам ва ўрочышча прывезлі саджанцы дрэваў. Іх высаджваюць вельмі блізка адзін да аднаго з боку Крыжа Пакутаў. Як мяркуе Павел Севярынец, гэта робіцца для таго, каб закрыць дрэвамі крыжы.
