У Лідскім раёне закрылі адміністрацыйную справу за ўскладанне Леніну вянка з калючым дротам
Лідская міліцыя закрыла адміністрацыйную справу ў дачыненні да сябра Партыі БНФ Вітольда Ашурка. Справа на актывіста была заведзена на мінулым тыдні за ўскладанне ім да помніка Леніна ў горадзе Бярозаўка вянка з калючым дротам. Па факце праведзенай праверкі, міліцыянты не заўважылі ў дзеяннях Ашурка складу правапарушэння па артыкуле “Дробнае хуліганства”. Актывіст таксама зазначае, што сваімі дзеяннямі грамадскі парадак ён не парушыў.
— Ускладанне вянка да помніка Леніну не з’яўляецца адміністрацыйным правапарушэннем. Нічога не было пашкоджана, не было ніякіх масавых мерапрыемстваў, ніякіх лозунгаў, ніякай сімволікі, а проста ўскладанне вянка. Тое, што вянок з калючым дротам, гэта дробязі. Нідзе, ні ў якіх нарматыўных актах не напісана, што вянок не можа быць з калючым дротам.
Нагадаем, што напярэдадні таго, як афіцыйныя беларускія ўлады адзначалі 100-годдзе Кастрычніцкага перавароту, Вітольд Ашурак усклаў да помніка Леніну ў Бярозаўцы вянок з калючым дротам, інсталяваны папяровымі чарапамі і надпісам “Гары ў пекле, кат”. У той жа дзень да яго дахаты прыйшлі міліцыянты, каб узяць тлумачэнні па гэтым факце.
Андрусь Панямонаў, Беларускае Радыё Рацыя
