У Лідзе затрымалі каля 20 чалавек, якія прыйшлі на суд Каспяровіча
Сёння ў Лідскім судзе затрымана з два дзясяткі чалавек, якія прыйшлі падтрымаць лідскага электраманцёра Івана Каспяровіча (ён вёў тэлеграм-канал «Ліда — дошка ганьбы»), паведамляе nn.by.
Дакладная прычына затрыманняў невядомая.
Адзін са сведкаў паспеў паведаміць, што затрыманне нібыта звязанае з эмацыйнай рэакцыяй людзей на прысуд Вітольду Ашурку — у тым жа судзе 18 студзеня суддзя Максім Філатаў прысудзіў Ашурку 5 гадоў калоніі. Людзі пачалі крычаць Філатаву «Ганьба!» і падтрымліваць Ашурка.
Прадстаўнік МУС па Гарадзенскай вобласці Яўген Дудко не адказаў „Нашай Ніве” нічога канкрэтнага:
«Так, людзі дастаўлены ў РАУС для правядзення праверкі ў рамках Адміністрацыйнага кодэкса, за што канкрэтна, пакуль сказаць не магу, колькі чалавек затрымана, таксама сказаць не магу — кагосьці пасля размовы ўжо адпусцілі», — сказаў Дудко.
