У Менску актывіста затрымалі за кашульку „Азоў” (абноўлена)
Раніцай 7 ліпеня на станцыі метро „Кунцаўшчына” ў Менску быў затрыманы грамадскі актывіст Міраслаў Лазоўскі. Падставай для затрымання стала апранутая на Лазоўскім кашулька з лагатыпам батальёна „Азоў”, купленая ім у Кіеве.
Як расказаў Лазоўскі, пытанні выклікала і кніга Віктара Казько „Час збіраць косці”, што перамагла сёлета ў прэстыжнай прэміі Гедройца. Супрацоўнікі міліцыі сказалі, што ў дадзеным выпадку трэба разабрацца наконт „падрыўной літаратуры”.
Грамадскаму актывісту Міраславу Лазоўскаму, паводле пастановы Фрунзенскай РУУС, прысудзілі штраф нібыта за брыдкаслоўе ў грамадскім месцы і адпусцілі. Пра гэта паведаміла супрацоўніца “Бацькаўшчыны” Ніна Шыдлоўская:
– Дазвольце выкарыстаць вашую дапамогу, каб падзякваць усім журналістам, хто аператыўна адгукнуўся. І таксама “Вясне”, якая вельмі аператыўна забяспечыла адвакатам. Я думаю, што дзякуючы гэтай супольнай увазе, Міраслава хутка, пасля таго як пачала тэлефанаваць прэса, як пачала тэлефанаваць адвакатка і даведвацца пра ягоны лёс, адпусцілі, аштрафаваўшы быццам бы за хуліганскія дзеянні ў метро. Дзве базавыя велічыні яму прысудзілі і тут жа адразу апусцілі. Але гэта было як раз пасля таго, калі супольнымі намаганнямі даведваліся пра ягоны лёс.
Напачатку міліцыя прапанавала калегам Лазоўскага, якія звярнуліся на станцыю, „дачакацца прыезду начальніка”, а потым параіла наўпрост звяртацца ў суд па месцы затрымання (г.зн. суд Фрунзенскага раёна).
Актывіста даставілі па адрасе праспект Незалежнасці, 6, дзе пратрымалі да 15-й гадзіны. За гэты час на яго склалі пратакол па артыкуле „Дробнае хуліганства” і аштрафавалі на 360 тыс. рублёў (2 базавыя велічыні) за „нецэнзурную лаянку” ў грамадскім месцы.
Анна Шайкоўская, Беларускае Радыё Рацыя
