У Менску і рэгіёнах прайшлі „Маршы пенсіянераў”
Лукашэнкаўцы ўжылі святлошумавыя прылады і газ для разгону пенсіянераў. Інцыдэнт адбыўся каля Беларускага нацыянальнага тэхнічнага ўніверсітэта на праспекце Незалежнасці ў Менску.
Удзельнікі маршу дайшлі да плошчы Якуба Коласа. Яны ўсклалі кветкі да помніка класіку, а таксама пакінулі плакаты: „НЕ крываваму рэжыму”, „Не забудзем, не даруем” ды іншыя.
Фота Кастуся Багушэвіча, Беларускае Радыё Рацыя.
Сілавікі сталі затрымліваць студэнтаў, якія выйшлі прывітаць старых людзей. Пенсіянеры спрабавалі вырваць іх з рук міліцыі, тады ў іх бок паляцелі святлошумавыя прылады, паведамляе карэспандэнт „Нашай Нівы”.
Жанчыны атачылі бус з сілавікамі і скандуюць «Фашысты!».
* * *
Праспект перакрыты, закрыты многія станцыі метро. Каб запалохаць пенсіянераў, ездзяць міліцэйскія бусікі. Галоўным лозунгам марша стала: „Нашы дзеці лепшыя за ўсіх!”.
Фота: Францішка Цярэшкі, Беларускае Радыё Рацыя
* * *
Праходзячы ля БНТУ пенсіянеры скандавалі: „Судэнты, мы з вамі!”.
* * *
Калона пенсіянераў налічвае ўжо некалькі тысяч чалавек. Яна дайшла да плошчы Перамогі. Людзі скандуюць: „Пошел вон, ты и твой ОМОН”, „Лукашэнку ў аўтазак!”.
ДАІ перакрыла рух па праспекце Незалежнасці ад скрыжавання з вуліцай Казлова ў напрамку цэнтра.
* * *
12 кастрычніка ў Менску, Гародні, Лідзе, Берасці, Гомелі, Салігорску, Магілёве ды іншых гарадах пенсіянеры выйшлі на акцыі пратэсту.
У Менску пенсіянеры сабраліся на плошчы Незалежнасці ля Чырвонага касцёла, а затым рушылі па праспекце. Яны скандуюць: «Верым, можам, пераможам», „Гэта наш горад!”. Іх падтрымліваюць сігналамі аўтамабілісты.
У менскай акцыі прымае ўдзел каля тысячы чалавек.
У Гародні людзі пажылога ўзросту сабраліся з кветкамі ў Парку Жылібера. Міліцыянты папярэдзілі іх, што мерапрыемства недазволенае. Як паведамляе БАЖ, затрымалі «для праверкі дакументаў» журналістаў Марыю Харэвіч і Сяргея Людкевіча. Іх павезлі ў Ленінскі РАУС.
У Берасці пенсіянеры скандуюць «Трэці ўзрост выходзь!» і „Верым, можам, пераможам! »
Беларускае Радыё Рацыя
