У Менску пабіты тэмпературны рэкорд дня 90-гадовай даўніны
Дзявяты дзень анамальнай спякоты прынёс яшчэ 23 рэкорды на беларускіх метэастанцыях, іх агульная колькасць за гэты перыяд узрасла да 146, сведчыць праведзены БелаПАН параўнальны аналіз аператыўных і архіўных дадзеных Белгідрамета на рэсурсе meteoinfo.by.
16 ліпеня ў Менску перакрыты абсалютны максімум дня за ўвесь перыяд метэаназіранняў — 33,3 градуса вышэй за нуль супраць 33 у 1931 годзе.
Абнавіліся экстрэмумы ў Берасці — 34,1 (33,5 у 2001 годзе), Віцебску — 34 (33,1 у 2010-м), Магілёве — 34 (33,5 у 1951-м), Гомелі — 33,7 (33,4 у 2010-м).
Гарачэй за ўсё было ў Драгічыне — 35,4 градуса цяпла, абсалютны рэкорд дня — 36,1 градуса 16 ліпеня 1994 года ў Стоўбцах.
Чакаецца, што паніжэнне тэмпературы пачнецца 18 ліпеня.
