У Менску пікетуюць амбасаду Расеі
Каля расейскай амбасады ў Менску зноў праходзіць пікет у падтрымку Надзеі Саўчанкі.
Салідарнасць са зняволенай расейскімі ўладамі ўкраінскай лётчыцай выказваюць актывісткі Наталля Басалыга-Гарачка і Вольга Мікалайчык:
– Мэта пікета – не пускаць іх на абед, крычаць ім у вочы, што Надзея памірае, што ў яе крытычны стан. Яны нават ужо не выходзяць праз галоўны ўваход амбасады, яны аб’язджаюць амбасаду, каб не чуць нашыя воклічы.
Надзея Саўчанка галадае, стан яе здароўя выклікае вялікія перасцярогі.
Вольга Мікалайчык і Наталля Басалыга-Гарачка таксама ўчора правялі пікеты ў падтрымку лётчыцы, за што на іх склалі адміністрацыйныя пратаколы.
Мікалайчык не сумняецца, што і сённяшні пікет пройдзе пад пільным наглядам праваахоўнікаў.
Беларускае Радыё Рацыя, Менск
