У Менску 21 студзеня былі затрыманыя некалькі актывістаў анархічнага руху. Вядома, што сярод затрыманых – Дзмітрый Паліенка і Яўген Чуліцкі. Пачата крымінальная справа за нанясенне графіці па арт. 341 Крымінальнага кодэксу (апаганьванне будынкаў і псаванне маёмасці).
Увесь учорашні дзень, як паведамляе ў сацыяльных сетках Марына Касінерава, затрыманыя правялі ў РУУС Заводскага раёна і Следчым камітэце. Толькі вечарам з’явілася інфармацыя, што яны знаходзяцца ў ізалятары часовага ўтрымання.
Прыкладна ў 10 гадзін раніцы на кватэры ў Яўгена Чуліцкага адбыўся ператрус, які праводзілі чатыры супрацоўнікі следчых органаў. Былі забраныя ноўтбук і некалькі тэлефонаў.
Па папярэдняй інфармацыі, былога палітвязня Зміцера Паліенку з сябрамі вінавацяць, што яны нібы 22 снежня мінулага года нанеслі графіці „Менты забіваюць людзей” на сцяну аднаго з гарадскіх будынкаў на вуліцы Ахоцкай.
Між тым, у Тэлеграм-канале Волна projekt. паведамляецца пра тое, што аднаму з анархістаў – Івану Комару ўдалося збегчы ад супрацоўнікаў міліцыі, якія чакалі яго каля дзвярэй пад’езда. Пакуль ягоны лёс невядомы.
