Затрыманых у Менску музыкантаў адпусцілі пасля складання пратаколаў (абноўлена)
Затрыманыя на вуліцы Рэвалюцыйнай у Менску музыканты Лявон Вольскі, Зміцер Вайцюшкевіч, Ігар Варашкевіч і Павел Аракелян адпушчаныя на волю пасля складання пратаколаў. Ва УУС Цэнтральнага раёна яны правялі прыблізна дзве гадзіны.
„Нас прывезлі ў міліцыю ў камфартабельным мікрааўтобусе. Потым доўга чакалі ў двары. Адпусцілі пасля высвятлення асобы і складання пратаколаў за спробу правядзення несанкцыянаванага мерапрыемства. Шчыра кажучы, не зразумеў, што гэта было. Мы збіраліся спакойна сесці і сыграць”, — сказаў БелаПАН Зміцер Вайцюшкевіч.
Паводле яго слоў, у РУУС знаходзіліся таксама жонка Вольскага і яго тэхнічны памочнік.
Музыкантаў затрымалі разам з іх інструментамі ў чахлах (гітарамі і саксафонам). Артысты мелі намер адзначыць Дзень Волі на лаўцы выкананнем песняў. Перад гэтым міні-канцэртам да Вольскага падышоў супрацоўнік міліцыі ў цывільным і папрасіў пайсці. Ён назваў музыканта арганізатарам несанкцыянаванага масавага мерапрыемства і папярэдзіў, што калі артысты будуць іграць, то ў яго дачыненні можа быць складзены пратакол на падставе артыкула 23.34 КаАП. Вольскі заявіў, што на гэтым месцы кожны дзень іграюць вулічныя музыканты і да іх няма прэтэнзій. Сілавік адказаў, што ў тых музыкантаў ёсць дазволы Менгарвыканкама.
Пасля гэтага пад’ехаў чорны мікрааўтобус з танаванымі шыбамі, з яго выйшлі супрацоўнікі АМАП у форме і цывільным, завялі ў яго музыкантаў і паехалі па Рэвалюцыйнай у бок плошчы Свабоды. Затрыманнем кіраваў намеснік начальніка УУС Цэнтральнага раёна Дзмітрый Шантыр. Тое, што адбылося, выклікала абурэнне двух дзясяткаў чалавек, якія сабраліся паслухаць канцэрт, і іншых музыкантаў. Яны скандавалі „Ганьба!”.
На просьбу БелаПАН растлумачыць, за што затрымалі музыкантаў, супрацоўнік у цывільным адказаў, што „ім ужо ўсё растлумачылі”.
Як паведамляе БелаПАН, усяго ў Менску было затрымана як мінімум 12 чалавек, якія вечарам 25 сакавіка выйшлі ў цэнтр горада, каб адзначыць Дзень Волі — 101-ю гадавіну абвяшчэння Беларускай Народнай Рэспублікі. У ліку затрыманых былі вядомыя музыканты, якіх ужо адпусцілі.
Радыё Свабода паведамляе, што затрыманых на Кастрычніцкай плошчы ў Менску вызвалілі, Алена Талстая застаецца на Акрэсціна.
* * *
Вядомыя беларускія музыкі — Лявон Вольскі, Зміцер Вайцюшкевіч, Ігар Варашкевіч, Павел Аракелян — збіраліся павіншаваць мінчукоў з Днём Волі вулічным канцэртам. Іх затрымалі, як толькі яны дасталі музычныя інструменты.
Як толькі Лявон Вольскі прыйшоў на месца сустрэчы, да яго падышоў міліцыянт і папярэдзіў, што канцэрт будзе расцэнены як несанкцыянаванае масавае мерапрыемства. Музыкі сталі раіцца, што ім рабіць, але рашэнне ім прыняць не далі. Праз некалькі хвілін пад’ехаў аўтобус з міліцыянтамі. Кіраўнік міліцыі Цэнтральнага раёна Менска запатрабаваў, каб музыканты прайшлі ў аўтобус. Яны затрыманыя «для высвятлення асобы».
У міліцыю трапілі Лявон Вольскі, Ігар Варашкевіч, Зміцер Вайцюшкевіч і Павел Аракелян, а таксама некалькі суправаджаючых іх асобаў.
Варта адзначыць, што некалькі дзясяткаў мінучкоў, што сабраліся на скрыжаванні, адрэагавалі на затрыманне выкананнем песень.
***
Лідарам апазіцыйных палітычных партый не дазволілі прайсці са сцягамі і кветкамі ад Кастрычніцкай плошчы да будынка, дзе была абвешчаная незалежнасць Беларускай Народнай Рэспублікі.
На Кастрычніцкую плошчу каля 18:00 завітаў былы старшыня Аб’яднанай грамадзянскай партыі Анатоль Лябедзька, пазней да яго падышлі цяперашні старшыня АГП Мікалай Казлоў і сустаршыня Беларускай хрысціянскай дэмакратыі Віталь Рымашэўскі. Рымашэўскага і Казлова затрымалі.
На выхадзе з метро людзьмі ў цывільным затрыманы малады чалавек у чырвона-бела-чырвоным шаліку, яшчэ дваіх затрымалі на плошчы і пагрузілі ў сіні мікрааўтобус.
Усяго на падыходзе да Кастрычніцкай і на самой плошчы затрыманыя ад 8 да 10 чалавек.
Зараз людзей на Кастрычніцкай плошчы няма.
Паведамляецца, што ўсіх затрыманых вязуць у Цэнтральнае РУУС.
