У Мікашэвічах згарэў дом маладой сям’і
У Мікашэвічах пажарныя не змаглі выратаваць дом і маёмасць маладой сям’і Таболіч.
Маладыя з двухгадовым дзіцём засталіся нанач у бацькоў. Пажар пачаўся з даху а пачатку 3 гадзіны ночы. Суседзі амаль адразу заўважылі полымя і выклікалі пажарных. Але замест 7 хвілін, якіх хапае на дарогу, пажарныя прыехалі праз паўгадзіны, кажа сусед пагарэльцаў Леанід Дубаносаў:
– Мы ўсё чакалі, што хутка прыедуць пажарныя. Ужо ўвесь дах ахапіла полымя, хлеў загарэўся, тады яны прыехалі. З двух бакоў пачалі тушыць. Напор вады быў слабы, бо шлангі дыравыя. Улады нас запэўніваюць, што мы абароненыя, што ў нас парадак. Які парадак, калі пажарныя не могуць патушыць пажар?!
Паводле Дубаносава, каб не спадзяванне на пажарных, то людзі хоць маёмасць уратавалі б. Згарэла не толькі маёмасць, але і вялікая сума грошай на будматэрыялы. Леанід яшчэ заўважыў, што на дапамогу прыехала машына пажарных за 20 кіламетраў з суседняга раёна, а пажарныя з прадпрыемства “Граніт”, што ў 7 кіламетрах, не здолелі.
Беларускае Радыё Рацыя
Глядзіце таксама
