У Наваградку хочуць перайменаваць вуліцу Савецкую ў гонар Барыса Кіта
Перайменаваць вуліцу Савецкую ў Наваградку і назваць яе ў гонар самага вядомага беларуса Барыса Кіта хочуць землякі вядомага навукоўца. Цяпер яны збіраюць подпісы пад петыцыяй, якую адправяць у мясцовы райвыканкам.
Петыцыя была створана 2 лютага і сабрала больш за дзве сотні подпісаў. У ёй аўтар нагадвае: знакаміты беларускі навуковец Барыс Кіт, які памёр 1 лютага на 108 годзе жыцця, вырас на Наваградскай зямлі і лічыцца ганаровым грамадзянінам горада.
„Лепш за ўсё для перайменавання падыходзіць вуліца Савецкая. Яна з’яўляецца адной з цэнтральных вуліц горада і праходзіць паралельна вуліцы Міцкевіча.
Такім чынам, пасля перайменавання ў сэрцы горада маглі б знаходзіцца дзве вуліцы, названыя ў гонар вядомых сыноў Наваградчыны „, – гаворыцца ў петыцыі.
Як дадае аўтар звароту, калісьці сам Барыс Кіт казаў, што прысваенне яму звання ганаровага грамадзяніна Наваградка было для яго самым вялікім гонарам.
Нагадаем, Барыс Кіт нарадзіўся ў 1910 годзе ў сям’і беларуса ў Пецярбургу, праз восем гадоў сям’я вярнулася на радзіму на Наваградчыну, тут Барыс Кіт у 1928 годзе скончыў беларускую гімназію.
Пасля заканчэння ў 1933 годзе Віленскага ўніверсітэта працаваў выкладчыкам. У 1948 г. пераехаў у ЗША, дзе працаваў над ракетным палівам і разлікамі палётаў касмічных караблёў.
З 1972 года Кіт жыў у Германіі, з’яўляецца аўтарам мноства навуковых прац і лаўрэатам розных міжнародных прэмій, валодаў сям’ю мовамі.
Глядзіце таксама
