У Пінску адкрылі мемарыяльны комплекс у гонар вызвалення
Галоўнай падзеяй да 70-годдзя перамогі над нацызмам у Пінску стала адкрыццё пасля капітальнай рэстаўрацыі „вечнага агню” і мемарыяльнага комплексу ў гонар вызвалення.
На будаўнічыя працы мясцовыя ўлады выдаткавалі каля 5 мільярдаў беларускіх рублёў.
„Вечны агонь” у Пінску запалілі ад паходні, якую прывезлі з Берасцейскай крэпасці. Цырымонію здзейсніў 91-гадовы ветэран, ганаровы грамадзянін Пінска Барыс Благавідаў.
Адзін з удзельнікаў урачыстасці, афіцэр запасу Аляксандр Новік адзначыў, што Другая сусветная вайна – жудаснае выпрабаванне, якое прайшлі беларусы:
– Гэта свята, бо колькі было пакладзена на алтар перамогі, колькі чалавек загінула, колькі чалавек працавала ў тылу – такімі сіламі кавалі перамогу. Гэта лёс, які напаткаў нашу краіну ў тыя гады.
Дзень Перамогі ў Пінску па традыцыі святкуюць у гістарычнай часцы горада ад цэнтральнай плошчы праз набярэжную да Гарадскога парка культуры і адпачынку. Завершацца гулянні а 22-й гадзіне святочным салютам.
Беларускае Радыё Рацыя
