У Пінску пройдзе навуковая канферэнцыя да 150-годдзя Рамана Скірмунта
Міжнародная навуковая канферэнцыя, прысвечаная 150-м угодкам з дня нараджэння Рамана Скірмунта, пройдзе ў Пінску. 24-25 траўня навукоўцы з Беларусі, Польшчы, Украіны збяруцца, каб абмеркаваць вынік сваіх даследаванняў пра лёс гэтага славутага чалавека, прэм’ер-міністра БНР.
Пра канферэнцыю: „Род Скірмунтаў у эпоху сацыяльнай мадэрнізацыі грамадства на землях „гістарычнай Літвы” кажа прафесар Алесь Смалянчук.
– Чаму ўвага да Рамана Скірмунта? Па-першае, гэта звязана з маімі асабістымі зацікаўленасцямі. Я даўно займаюся біяграфіяй гэтага чалавека. І нарэшце практычна закончыў працу над кнігай. А другі момант, гэтая кніга і сама постаць, і даследаванні прымушаюць шмат што перагледзець у беларускай гістарыяграфіі. Яна з’яўляецца сама па сабе пэўным выклікам беларускай нацыянальнай гістарыяграфіі. Бо, напрыклад, Раман Скірмунт не ўпісваецца ў вузканацыянальную парадыгму беларускую.
Піншчына для навуковай канферэнцыі была ўзята не дарэмна. Менавіна на Піншчыне, у вёсцы Парэчча нарадзіўся і быў пахаваны Раман Скірмунт. Менавіта туды на другі дзень канферэнцыі навукоўцы накіруюцца адмысловай экскурсіяй па мясцінах славутага роду Палесся. Гаворыць Алесь Смалянчук:
– Мы плануем падарожжа па скірмунтаўскіх мясцінах, якое пачнецца ў Пінску. Пасля наведаем Парэчча, дзе нарадзіўся і пахаваны Раман Скірмунт. І Моладава, дзе ягоныя блізкія сваякі загінулі ў 1939 годзе. Я праводзіў экспедыцыі па “Вуснай гісторыі” у самім Парэччы і наваколлях, з 1999 года пачынаючы. Сабралі мы велізарную колькасць вусных успамінаў пра Рамана Скірмунта. На жаль, што тычыцца палітыкаў, нікога знайсці не атрымалася.
На жаль, Пінскі універсітэт не захацеў прымаць удзел у навуковым форуме гісторыкаў. Ён праходзіць пад патранажам Польскага Інстытута ў Менску, Інстытута Славістыкі Польскай Акадэміі Навук з Варшавы і Генеральнага консульства Польшчы ў Берасці. Далучацца да дыскусіі канферэнцыі мясцовыя краязнаўцы.
Якуб Сушчынскі, Беларускае Радыё Рацыя, Гародня
Глядзіце таксама
