У Расеі завялі справу за прыніжэнне „ватнікаў”
Выкарыстанне папулярнага на постсавецкай прасторы слова „ватнік” для абазначэння асобных жыхароў Расейскай Федэрацыі можа абысціся 19-гадоваму жыхару Саратава Аляксандру Газенка турэмным зняволеннем на тэрмін да 5 гадоў. „Ватнікі” апынуліся занадта абразлівымі, і напісалі на яго заяву ў пракуратуру. Там, нядоўга думаючы, завялі на саратаўчаніна крымінальную справу па частцы 1 артыкула 282 КК РФ – „Узбуджэнне нянавісці ці варожасці, а таксама зневажэнне чалавечай годнасці”, перадае расейскі праваабарончы рэсурс „Сава”.
Фота by24.org
У цяперашні час расследаванне крымінальнай справы ў дачыненні да Аляксандра Газенкі ўжо завершана. Яно перададзена для разгляду ў суд Кастрычніцкага раёна горада Саратава.
– Згодна з матэрыяламі справы, 13 і 14 лістапада 2015 года грамадзянін Газенка, знаходзячыся ў сябе дома і выкарыстоўваючы персанальны камп’ютар, апублікаваў чатыры каментара ў сацыяльнай сетцы „УКантакце”, – распавялі журналістам у пракуратуры Кастрычніцкага раёна горада Саратава. – Экспертнае даследаванне выявіла ў гэтых фразах псіхалагічныя прыкметы падахвочвання да дзеянняў гвалтоўнага характару ў дачыненні да групы асоб пэўнай нацыянальнай прыналежнасці. У прыватнасці, гаворка ідзе, напрыклад, пра каментары „Прапаную арганізаваць халакост ваты”.
Акрамя таго, лічыць бок абвінавачвання, ёсць пытанні ў рамках закона і да яшчэ аднаго каментарыя Аляксандра Газенкі, накіраваным на адрас іншага карыстальніка „Укантакце”. У прыватнасці, абвінавачаны напісаў: „А ты ватнік і кацап. Як па-іншаму быдла назавеш?” Гэта, на думку праваахоўнікаў, з’яўляецца абразай па нацыянальнай прыкмеце.
У той жа час саратаўскія праваабаронцы катэгарычна не згодныя з вынікамі следства, настойваючы на тым, што „вызначэнне” ватнікі”, якое распаўсюджваецца на сацыяльную групу „расейцы”, з’яўляецца недакладным, і таму павінна быць выключана з кваліфікацыі экстрэмісцкіх артыкулаў”. Праўда, калі суд усё ж пагодзіцца з абвінавачваннем, ён створыць гэтым юрыдычны прэцэдэнт: „расейцы” будуць прызнаныя „ватнікамі” ўжо афіцыйна.
