У справе аб гібелі шараговага Коржыча ў Пячах ужо восем падазраваных
Як паведаміў БелаПАН начальнік аддзела інфармацыі і сувязяў з грамадскасцю Следчага камітэта Беларусі Сяргей Кабаковіч, крымінальная справа аб гібелі радавога Аляксандра Коржыча ў вайсковай часці ў Пячах прынятая да вытворчасці галоўным следчым упраўленнем цэнтральнага апарата СК.
У ходзе ўстанаўлення абставінаў гібелі Коржыча Следчым камітэтам атрыманая інфармацыя аб учыненні шэрагу воінскіх злачынстваў, сказаў Кабаковіч. Распачата восем крымінальных спраў у дачыненні да васьмі ваеннаслужачых па артыкулах 443, 455, 209 КК.
„Праводзяцца следчыя дзеянні, накіраваныя на вывучэнне сітуацыі ў цэлым. Сярод разгляданых следствам пытанняў — выкананне службовымі асобамі 72-га Аб’яднанага навучальнага цэнтра абавязкаў па выкананні законнасці і папярэджанні правапарушэнняў. У сукупнасці будзе дадзена крымінальна-прававая ацэнка, у тым ліку бяздзейнасці вышэшых камандзіраў, іншых кіраўнікоў у навучальным цэнтры і вайсковых частках, якія ўваходзяць у яго склад”, — сказаў Кабаковіч.
Зараз у ліку падазраваных сем малодшых камандзіраў (сяржанты), а таксама старшына роты. Да ўсіх прымененая мера стрымання ў выглядзе ўзяцця пад варту, рыхтуюцца матэрыялы для прад’яўлення ім абвінавачвання.
Пяць сяржантаў затрыманыя 13 і 14 кастрычніка па падазрэнні ва ўжыванні фізічнага насілля ў дачыненні да падначаленых курсантаў і сістэматычным атрыманні ад іх цыгарэт і прадуктаў харчавання. Іх дзеянні кваліфікаваныя па ч. 2 арт. 455 КК.
Крымінальныя справы прынятыя для расследавання галоўным следчым упраўленнем цэнтральнага апарата Следчага камітэта і аб’яднаныя ў адну вытворчасць. Для ўстанаўлення ўсіх абставінаў учыненых злачынстваў створаная следчая група.
Цяпер з мэтай высвятлення абставінаў гібелі радавога Коржыча следчымі праводзяцца допыты, вочныя стаўкі, чакаюцца вынікі шэрагу экспертных даследаванняў.
Нагадаем, 21-гадовага Аляксандра Коржыча знайшлі ў пятлі са звязанымі нагамі і надзетай на галаву майкай 3 кастрычніка ў склепе ў вайсковай частцы ў Пячах. 5 кастрычніка следства ў якасці першапачатковай версіі назвало суіцыд.
Сваякі з гэтай версіяй не пагадзіліся і заявілі пра гвалтоўны характар смерці. У выніку Следчы камітэт пачаў справу па ч. 3 арт. 443 КК (парушэнне статутных правілаў узаемаадносін паміж асобамі, на якіх распаўсюджваецца статус ваеннаслужачага, пры адсутнасці адносін падпарадкаванасці, якое пацягнула цяжкія наступствы). Камітэт разглядае тры версіі здарэння: давядзенне да самагубства, забойства і самагубства.
Загадам міністра абароны за непрыняцце вычарпальных мер па падтрыманні статутнага парадку адхіленыя ад пасады пяць службовых асоб 72-га Аб’яднанага навучальнага цэнтра, уключаючы камандзіра вайсковай часткі, дзе праходзіў службу вайсковец. Чацвёра службовых асоб звольненыя з Узброеных сіл.
Сітуацыя вакол гібелі радавога Коржыча знаходзіцца на асабістым кантролі Аляксандра Лукашэнкі.
