У Свіслачы прайшлі першыя карныя адміністрацыйныя працэсы
У Свіслачы прайшлі першыя адміністрацыйныя працэсы ў дачыненні да грамадскіх актывістаў, якія ўдзельнічалі ў Дні памяці паўстанцаў 1863 года ў Свіслачы і Якушоўцы, паведамляе „Гарадзенская вясна”.
15 лістапада старшыня Свіслацкага раённага суду Аляксандр Шылін засудзіў грамадскага актывіста Юры Глебіка паводле артыкулу 23.34, частка 1 да 25 базавых велічынь штрафу. Ён жа 16 лістапада аштрафаваў іншага грамадскага актывіста Віктара Пяцельчыца на 10 базавых велічынь.
Старшыня Свіслацкага суду Аляксандр Шылін мае багаты досвед карных пастановаў – у ранейшыя гады – у 2012-ым, 2014-ым, 2015-ым і 2016-ым гадах ужо засуджваў грамадскіх актывістаў да адміністрацыйнага арышту і штрафаў за ўдзел у традыцыйным Дні памяці паўстанцаў.
Даты судоў у дачыненні да гарадзенскіх праваабаронцаў і грамадскіх актывістаў яшчэ невядомыя. Віктар Сазонаў, Уладзімір Хільмановіч і Ежы Грыгенча ўжо азнаёміліся з складзенымі на іх пратаколамі пра нібыта адміністрацыйныя правапарушэнні. Таксама аналагічныя пратаколы складзены на Мікалая Саляніка, Сяргея Верамеенку і Ігара Банцара.
