У Віцебску скасавалі адміністрацыйную справу супраць незалежнага журналіста
Рашэнне скасаваць справу, пачатую супраць журналіста-фрылансера Вячаслава Лазарава, прыняў суд Кастрычніцкага раёна. Паводле міліцэйскага пратакола , журналіст размясціў здымкі з акцыі мірнага пратэсту 4-га кастрычніка ў тэлеграм-канале “Белсата”, тым самым парушыўшы парадак вырабу і размяшчэння прадукцыі СМІ”. Суд разбіраў гэтую справу ў два этапы: 20-га кастрычніка суддзя Ілля Белавус накіраваў дакументы на дапрацоўку ў міліцыю. Потым справу перадалі суддзі Мікалаю Атрахімовічу, які і скасаваў яе праз адсутнасць доказаў правапарушэння.
Вячаслаў Лазараў задаволены такім судовым рашэннем:
-Мяне судзілі ўжо два разы перад гэтым. Але якія б доказы не былі, суддзя рабіў выгляд, што сур’ёзна разбіраецца, але вынік быў адзін і той самы – штраф. А вось каб справу спынілі – гэта, напэўна, такая справа мая першая, калі віну не змаглі даказаць.
Праваабаронца Павел Левінаў, які прысутнічаў на судзе, выказвае апасенні, што рашэнне суддзі могуць абскардзіць супрацоўнікі міліцыі:
– Пастанова гэтая яшчэ не ўступіла ў законную сілу, і ў органа адміністрацыйнага пераследу яшчэ ёсць час яе абскардзіць. Разам з тым, сапраўды не даказана, што Лазараў нешта недзе размяшчаў. І тое, што ён вырабляе прадукцыю ў якасці СМІ, суд палічыў абсурдным меркаваннем супрацоўнікаў органаў унутраных справаў.
Суд скасаваў справу супраць журналіста, распачатую паводле артыкула 22.9 КаАП. Аднак два дні таму Вячаслаў Лазараў быў затрыманы паводле падазрэння ў парушэнні артыкула 23.34 КаАП. Ягоны ўдзел у несанкцыянаваным мерапрыемстве міліцыянты даказаць не змаглі, але арыштавалі ягоную машыну — нібыта для праверкі. Але калегі мяркуюць, што такім чынам міліцыя імкнецца перашкодзіць ягонай прафесійнай дзейнасці.
Беларускае Радыё Рацыя, Віцебск
