У Воршы стартавала парафіяда
Парафіяда дзяцей і моладзі Віцебскай дыяцэзіі распачалася ў Воршы. Яна праводзіцца ўжо трэці год па ініцыятыве ксяндза Валерыя Орсіка. Сёлета ў ёй прымаюць удзел 7 каманд з Віцебскай вобласці. Парафіяда складаецца з трох асноўных частак: рэлігійнай, спартовай і культурніцкай. Моладзь павінна найлепш праявіць сябе ва ўсіх гэтых катэгорыях.
Паводле пробашча парафіі Беззаганнага Сэрца Марыі ў Воршы Валерыя Орсіка, з кожным годам парафіяда набывае ўсё больш глыбейшы і дасканальнейшы ўзровень.
– Сёлета парафіяда прысвечана 100-годдзю аб’яўлення ў Фаціме. І перадусім хацелася б, каб падчас гэтай парафіяды дзеткі рабілі маніфестацыю сваёй веры, тых супольнасцяў, дзе яны працуюць, з якіх парафій паходзяць, з якіх парафій яны сюды прыехалі.
Парафіяду адкрыў біскуп Віцебскай дыяцэзіі Алег Буткевіч, аршанскія вучні з патрыятычнага класа ўрачыста пранеслі сцяг парафіяды. Потым адбылася святая імша і канцэрт гурта LAUDANS.
Парафіяда ў Воршы будзе доўжыцца тры дні. Наперадзе моладзь чакае спаборніцтвы, майстар-класы, конкурсы рэлігійнай песні, канферэнцыя ды іншае.
[Not a valid template]
Таццяна Смоткіна, Беларускае Радыё Рацыя, Ворша
Фота аўтаркі
Глядзіце таксама
