Улады адмаўляюцца агучыць прозвішчы ахвяраў Курапатаў
Генеральная пракуратура Беларусі адмаўляецца назваць прозвішчы грамадзянаў, парэшткі і дакументы якіх знойдзеныя ў Курапатах – месцы масавых расстрэлаў сталінскіх часоў пад Менскам. Паводле грамадскага актывіста і журналіста Марата Гаравога, адмова тлумачыцца засакрэчанасцю матэрыялаў крымінальнай справы аб пахаваннях у Курапатах:
– На наш погляд, гэта неабгрунтаваны адказ. У ім не названы нарматыўна-прававы акт, які наклаў грыф сакрэтнасці на матэрыялы, якія маюць гістарычнае, маральнае і духоўнае значэнне для народу Рэспублікі Беларусь і міжнароднай супольнасці.
Як падкрэслівае юрыст Тамара Сяргей, пракуратура павінна стаяць на “стражы законнасці”:
– Раз яны не сказалі, якія прозвішчы вядомыя, а заявілі пра тое, што накладзены грыф сакрэтнасці на матэрыялы, якія маюць гістарычную і духоўную каштоўнасць, гэта гаворыць пра тое, што Генеральная пракуратура насуперак сваіх абавязкаў бароніць нечыя асабістыя інтарэсы, а не інтарэсы нашага народа, нават не інтарэсы дзяржавы. І гэта павінна вельмі непакоіць нашу грамадскасць і наш народ.
Бліжэйшым крокам стане новы запыт у Генеральную пракуратуру Беларусі аб прозвішчах пахаваных у Курапатах. Таксама не выключаецца пазоў у суд на пракуратуру, якая адмовіла ў прадстаўленні такой інфармацыі.
Беларускае Радыё Рацыя
Глядзіце таксама
