Улады Гарадзеншчыны прапануюць пашырыць бязвізавую зону
Уладзімір Краўцоў адказаў на пытанні журналістаў падчас чарговай прэс-канферэнцыі, якая прайшла ў Іўі. Тычыліся яны і бязвізу.
Абласныя ўлады выйшлі з прапановай пашырэння бязвізавай зоны.
— Мы выказалі намер уключыць туды Шчучынскі, Воранаўскі, Лідскі раёны і павялічыць тэрмін знаходжання турыстаў да аднаго месяца, — адзначыў Уладзімір Краўцоў. — Прапановы знаходзяцца ў стадыі ўзгаднення з рознымі ведамствамі. Гэта дасць дадатковы штуршок у развіцці турызму ў Гарадзенскай вобласці.
Між тым работа па рэканструкцыі многіх гістарычных аб’ектаў вядзецца актыўна. У рамках дзяржаўнай інвестпраграмы ідуць работы ў Старым замку. У 2020 годзе плануецца ўвесці першую чаргу. Сёлета — завяршыць рэканструкцыю другой вежы Лідскага замка і адкрыць яго для турыстаў. Асвойваюцца сродкі прэзідэнцкага фонду на Гальшанскім і Крэўскім замках.
Да 75-годдзя Гарадзенскай вобласці ёсць намер увесці палацава-паркавы комплекс «Свяцк». У Іўеўскім раёне былы маёнтак Умястоўскіх — копію палаца ў польскіх Лазенках — выкупіў беларускі інвестар і пачаў яго аднаўляць. У вобласці ёсць іншыя маёнткі, якія купілі прыватныя інвестары і робяць турыстычныя аб’екты.
Будзе працягвацца работа па ўшанаванні вядомых асоб старажытнага горада. Непадалёк ад Старога і Новага замкаў нядаўна з’явіўся помнік Давыду Гарадзенскаму — гарадскому старасту. Да Дня пісьменства ў Слоніме будзе ўстаноўлены помнік Льву Сапегу, у Дзятлаве будзе ўвекавечана асоба Канстанціна Астрожскага. Гэтыя ідэі ідуць ад людзей, і ўлады да іх прыслухоўваюцца.
На прэс-канферэнцыі прагучала прапанова па стварэнні ў Гародні музея вядомага пісьменніка Васіля Быкава. Матэрыял пра яго існуе ў некалькіх музеях, але ён разрознены. Магчымасць стварэння такога музея будзе разглядацца.
Паводле zviazda.by
Фота 015.by
