Улады Гародні пачалі ўпарадкаванне пустыра ў мікрараёне Вішнявец
Улады Гародні пачалі ўпарадкаванне пустыра ў мікрараёне Вішнявец. Гэта адбылося на суботніку, які быў у мінулыя выходныя. Па словах грамадскага актывіста Анатоля Мышкевіча, на працы па ўпарадкаванні Вішняўца паўплывалі сабраныя ім 300 подпісаў і сустрэча са старшынём Гарадзенскага гарвыканкама Мечыславам Гоем.
Кажа Анатоль Мышкевіч:
– Восенню мінулага года я сабраў каля 300 подпісаў жыхароў дамоў, якія пражываюць вакол гэтага пустыра. Занёс іх старшыні Гарадзенскага гарвыканкама. Папрасіў зрабіць зялёную зону, бо ў нас іх няма. Мечыслаў Гой прыслухаўся да пажаданняў жыхароў мікрараёна Вішнявец. І вось на суботніку пасадзілі больш за 100 дрэў.
Анатоль Мышкевіч лічыць, што працы па ўпарадкаванні пустыра былі зробленыя з памылкамі:
– Хацелася б, каб спачатку гэтае поле зраўнялі, каб пасля можна было пакласці пешаходныя дарожкі. Цяпер гэтага не зробіш. Спадзяюся, што паставяць хаця б дзве альтанкі, пару лавачак. Каб летам можна было ў гэтым парку пасядзець, падыхаць свежым паветрам.
Актывіст спадзяецца, што праца па давядзенні да ладу гэтага кавалка пустой зямлі на гарадзенскім Вішняўцы будзе зроблена цягам бліжэйшых месяцаў.
Беларускае Радыё Рацыя, Гародня
Глядзіце таксама
