Улады Светлагорска забараняюць пікеты супраць шкоднай вытворчасці
У Светлагорску паміж мясцовымі актыўнымі гараджанамі і ўладамі ідзе ціхая вайна. Прычынай гэтай вайны стала забарона ўладамі агучваць публічныя выказванні супраць шкоднага завода бялёнай цэлюлозы.
Улада правакуе людзей на супраціў і штрафы праз суды, не дазваляючы ім масавыя мерапрыемствы на адзіным дазволеным месцы – стадыёне ля спартовай школы за двухметровым плотам, кажа сябра Праваабарончага цэнтра “Вясна” Алена Маслюкова:
– 10 заяў пададзена і ніводная з іх не задаволеная. Мы вырашылі, што з уладамі трэба размаўляць праз суд. Мы пачалі падаваць скаргі ў суд на дзеянні Светлагорскага райвыканкама і тых пасадавых асобаў, якія нам у гэтым адмаўляюць. Ужо завершылася справа па маёй скарзе. Суд яе не задаволіў. Зразумела, што суд прымае бок гарадскіх уладаў. Гэта сітуацыя абсалютна ненармальная.
Паводле Алены Маслюковай, адмовіліся ўлады і ад прапановы пашырыць месцы масавых мерапрыемстваў, каб пазбегнуць накладак, як гэта было апошнім разам у дазволеным месцы. Але ўлады праігнаравалі прапанову. Паколькі палічылі пашырэнне немэтазгодным. А вось расправіцца з актывістамі флэш-мобу “За чысты горад” на плошчы – і ўлада, і суды тут як тут. Але актыўныя грамадзяне не збіраюцца здавацца.
Беларускае Радыё Рацыя
