Уладзімір Вялічкін: Правасуддзя няма, ёсць палітычная расправа
Як выглядаюць зараз суды па крымінальных палітычнаматываваных справах у Берасці? Чаму адных караюць „хатняй хіміяй”, а іншых адпраўляюць у калонію строгага рэжыму? Ці ўсе прызнаюць сваю віну? Як адчуваюць сябе родныя і блізкія асуджаных?
На такія ды іншыя пытанні шукаў адказы наш сённяшні „Госць Рацыі” праваабаронца Уладзімір Вялічкін.
РР: Вашая ацэнка судоў, што зараз адбываюцца, і якімі словамі можна назваць апошнія судовыя працэсы?
Уладзімір Вялічкін: Правасуддзя мы не бачым, мы бачым расправу па палітычных матывах над удзельнікамі масавых пратэстаў і над іншадумцамі.
РР: Па якіх справах прысуды самыя жорсткія?
Уладзімір Вялічкін: Самыя дзікія расправы – гэта над удзельнікамі так званага “карагоду” 13 верасня. Калі людзі патанцавалі і папляскалі ў далоні. І іх за гэта судзяць і караюць не толькі “хатняй хіміяй”, але і “хіміяй” з накіраваннем і нават адпраўляюць у калоніі.
РР: Як вы думаеце, чаму менавіта “карагодная справа”, што ў ёй асаблівага?
Уладзімір Вялічкін: Найбольш абурае тое, што людзі не здзейснілі ня тое што нейкага крымінальнага, адміністрацыйнага правапарушэнняў, уся іхная віна ў тым, што яны патаньчылі на праезнай частцы і папляскалі ў далоні. Шмат судзяць тых, хто нават не выходзіў на праезную частку. Проста чалавек там прысутнічаў. І гэтага дастаткова, каб яго абвінаваціць. І калі не пасадзіць, то на “хімію” адправіць.
Прыгадаем “пінскую справу”, якую назвалі “пінскай бойняй”! 109 міліцыянтаў спрабуюць спагнаць з 14 пінчукоў, якія іх так страшна “напалохалі”, каля 380 тысяч рублёў. Дзе гэта бачна? Сярод пінчукоў ёсць моцна параненыя і пацярпелыя. Сярод міліцыянтаў амаль няма, драпіны. За што людзей караюць і засуджваюць на 6 гадоў?!
Колькасць тых, хто праходзіць па крымінальных палітычнаматываваных справах вылічваецца сотнямі. Толькі палітвязнямі па Берасцейскай вобласці прызнаныя звыш дзевяці дзясяткаў чалавек.
Цалкам гутарка ў далучаным файле:
Беларускае Радыё Рацыя
