Унікальны фільм пра Слонім 1929 года прывезлі з ЗША
Габрэй Сімон Левінгер з ЗША ўжо некалькі разоў наведвае Слонім. Ён шукае сляды заснавальніка дынастыі слонімскіх хасідаў Аўрама Вайнберга. Нядаўна яму ўдалося адшукаць каля былых старых габрэйскіх могілак у Слоніме месца, дзе знаходзіўся дом Вайнберга. Спадар Левінгер прывёз у падарунак слонімцам і ўнікальны 15-хвілінны фільм пра Слонім, зняты ў 1929 годзе. Гэтыя кадры Слоніма здымаў былы слонімскі эмігрант Саламон Шэнберг-Левадзі. Ён выехаў са Слоніме ў пазамінулым стагоддзі, жыў у Палестыне і ЗША. У 1929 годзе Саламон Шэнберг-Левадзі наведаў родны горад над Шчарай і зрабіў гэтыя ўнікальныя здымкі, якія захаваліся да сённяшніх дзён. У фільме паказана жыццё габрэяў, цэнтр Слоніма, Слонім з іншых ракурсаў – такім, якім ён быў у 1929 годзе, калі знаходзіўся пад Польшчай. Рэдкія і ўнікальныя дакументальныя кадры Слоніма – гэта пэўная старонка ў гісторыі не толькі Слоніма, але і дакументальнага беларускага кіно.
Беларускае Радыё Рацыя
Глядзіце таксама
