Жыхара Мазыра аштрафавалі за абразу беларускай мовы
Жыхара Мазыра Дзмітрыя Шчарбатых прыцягнулі да адміністрацыйнай адказнасці за беларусафобскія выказванні. У пабліку мазырскага футбольнага клубу „Славія” ў сацыяльнай сетцы „Укантакце” малады чалавек 1988 года нараджэння дапусціў абразлівыя паведамленні пра беларускую мову.
Дзмітрыя Шчарбатых (Фота vk.com)
Ці варта спрабаваць прыцягваць да адказнасці, прадугледжанай заканадаўствам, беларусафобаў? На гэтыя пытанне адказвае актывіст грамадзянскай кампаніі „Справаводства па-беларуску” Ігар Случак у размове з Міколам Бянько.
РР: У Беларусі прыцягнулі да адміністрацыйнай адказнасці грамадзяніна, які выказаўся зняважліва пра беларускую мову. Можаце перадгісторыю канфлікту распавесці?
– Я цікаўлюся спортам, беларускай мовай. Звяртаюся да клубаў, каб яны пашыралі беларускую мову, ужывалі яе. У апошнія гады гэта знаходзіць водгук. Шмат футбольных клубаў перайшлі на беларускую мову. Я перыядычна праглядаю сацыяльныя сеткі, сайты, каб пабачыць навінкі футбольных клубаў.
РР: І ўсё ж такі Дзмітрый Шчарбатых… Якім чынам вы патрапілі на ягоны акаўнт і ягоныя каментары?
– Я зайшоў на суполку ФК “Славія” і там убачыў навіну пра тое, што паставілі вялікі беларускамоўны білборд, які рэкламуе футбольны клуб “Славія”. Пад гэтай навіной былі каментары. І адзін з іх гучаў так: “Навошта тут з’явілася беларуская мова”. Праўда, там было слова не “з’явілася, а “вср*лся”. На гэта я напісаў: “Вы парушаеце заканадаўства, выбачыцеся за свае словы”. На што атрымаў адказ: “Дружок, я не понімаю по-беларускі”. Я падумаў, калі не разумееш, то няма чаго рабіць — і звярнуся ў Мазырскі гарвыканкам.
РР: Фактычна мы ўпершыню сутыкнуліся з сітуацыяй, калі грамадзяніна прыцягнулі да адказнасці?
– Раней прэцэдэнты, калі спрабавалі прыцягнуць да адказнасці, таксама былі, але не даходзілі да лагічнага завяршэння. Нават я ў 2010 годзе спрабаваў прыцягнуць да адказнасці рэкатара Менскага інстытуту кіравання Мікалая Сушу, які на маю прапанову адказаць на беларускамоўны ліст па-беларуску, напісаў: “Ігар, вучыце беларускую мову, пашырайце свой кругагляд”. Я тады таксама звярнуўся з заявай у Адміністрацыю Заводскага раёну, але там тэрміны выйшлі і рэктара не пакаралі. Але Адміністрацыя Заводскага раёну накіравала яму ліст ва ўніверсітэт, каб былі карэктныя паводзіны ў адказах на звароты грамадзян.
РР: Ёсць меркаванні ў Інтэрнэце, што Ігар Случак такімі дзеяннямі толькі адштурхоўвае патэнцыйных прыхільнікаў ад беларускай мовы?
– Кал будзе прэцэдэнт і гэтыя людзі, якія ненавідзяць беларускую мову, будуць разумець, што хопіць зневажаць мову. Бо за гэта давядзецца несці адказнасць.
Жыхара Мазыра, ураджэнца Казахстану, Дзмітрыя Шчарбатых пакаралі на 4 базавыя велічыні. Паводле беларускага заканадаўства, публічная знявага беларускай мовы можа карацца штрафам ад 4 да 10 базавых велічыняў. То бок гэта мінімальны штраф, які можна атрымаць за знявагу мовы.
Між іншым, малады чалавек у сацыяльнай сетцы “ВК” ужо змяніў сваё імя і прозвішча на Дзмітрый Іваноў.
Мікола Бянько, Беларускае Радыё Рацыя
