Уступіла ў сілу новая рэдакцыя Жыллёвага кодэкса
У Беларусі з 1 студзеня ўступіла ў сілу новая рэдакцыя Жыллёвага кодэкса. Закон, якім уносяцца змяненні ў нарматыўныя прававыя акты ў сферы жыллёвых адносін, прыняты 4 мая 2019 года і змяшчае звыш 164 старонак. У ім сістэматызаваны прынятыя раней дакументы. З галоўных момантаў можна вылучыць карэкціроўку пытанняў рэгулявання арэнднага і сацыяльнага жылля, кіравання агульнай маёмасцю сумесных домаўладанняў, дзейнасцю таварыстваў уласнікаў і арганізацый забудоўшчыкаў.
У ЖК замацавана новая структура платы за жыллёва-камунальныя паслугі, паняцці, класіфікацыя і парадак прадастаўлення якіх прыведзены ва ўказе нумар 535. Прапісаны асаблівасці функцыянавання рахункаў, на якіх акумулююцца сродкі на капітальны рамонт, правы тых, хто з’яўляецца ўдзельнікам долевай уласнасці.
Таксама змяніліся падыходы да пастаноўкі на ўлік жыхароў, якія маюць патрэбу ў паляпшэнні жыллёвых умоў Менскага раёна. Семʼі змогуць прэтэндаваць на паляпшэнне сваіх жыллёвых умоў на тэрыторыі раёна пры ўмове адсутнасці ў іх уласнасці і (або) валоданні жылых памяшканняў, размешчаных не толькі ў гэтым населеным пункце, але і ў сталіцы. Скарэктаваны таксама выпадкі пагаршэння жыллёвых умоў з боку грамадзянаў.
Замацоўваецца норма, у сілу якой сацыяльна неабароненыя катэгорыі асоб, якія пражываюць у арэнднай кватэры і маюць права на сацыяльнае жыллё, могуць пераводзіць занятае памяшканне ў катэгорыю сацыяльнага. Пры прадастаўленні жылога памяшкання сацыяльнага карыстання ўстаноўлена, што яно не можа быць менш за аднапакаёвую кватэру. Акрамя таго, людзям, якія атрымалі інваліднасць у перыяд валодання дзяржаўным жыллёвым фондам, прадастаўлена магчымасць памяняць кватэру, калі іх дом па тэхнічных прычынах не можа быць абсталяваны безбарʼерным асяроддзем.
Што датычыцца кіравання сумеснымі домаўладаннямі, то зніжана доля галасоў, неабходных для прыняцця рашэнняў па ўсіх пытаннях, якія ўваходзяць у кампетэнцыю агульнага сходу. Стане прасцей праводзіць завочнае галасаванне, змогуць ствараць таварыствы ўласнікаў жыхары блакаваных жылых дамоў пры ўмове знаходжання будынкаў на сумежных зямельных участках.
Глядзіце таксама
