Вадзім Саранчукоў: Карыстаюся ўсімі правамі, што дае Канстытуцыя
Гарадзенскі палітык, намеснік старшыні Партыі БНФ Вадзім Саранчукоў, лічыць добрым тое, што ў малых гарадах і мікрараёнах абласных цэнтраў штодня павялічваецца актыўнасць грамадзян.
– Кожнаму грамадзяніну гарантуецца права мець свае перакананні і свабодна іх выказваць. Гэтае права дадзена Канстытуцыяй і ніхто не можа яго абмяжоўваць і забіраць у грамадзян. Карыстацца сваім правам безумоўна добра.
РР: Сябры вашай партыі ўдзельнічаюць у такіх малых актыўнасцях, якія адбываюцца ў малых раёнах, ці малых мікрараёнах?
– Усе сябры партыі БНФ грамадска актыўныя людзі і яны таксама карыстаюцца ўсімі правамі, якія гарантаваныя Канстытуцыяй Рэспублікі Беларусь.
РР: А самі вы ўдзельнічаеце ў такіх акцыях?
– Я звычайны грамадзянін гэтай краіны. Я таксама карыстаюся ўсімі правамі, які надазены мне Канстытуцыяй.
Вадзім Саранчукоў разам з прадстаўнікамі іншых партый ды арганізацый днямі атрымалі ад гарадзенскага гарвыканкама адмову аб правядзенні ў Каложскім Парку Гародні масавага мерапрыемства. Каложскі парк да гэтага лічыўся месцам, дзе дзейнічаў паведамляльны прынцып правядзення масавых мерапрыемстваў. Улады Гародні забаранілі мерапрыемства, спасылаюся на эпідэміялагічную сітуацыю ў краіне.
Беларускае Радыё Рацыя
