Віншаванні са святам Божага Нараджэння з Ліды
У Беларусі працягваецца святочны перыяд у вернікаў заходніх цэркваў, а праваслаўныя рыхтуюцца да свята Божага Нараджэння.
У Лідзе здаўна жывуць побач людзі розных канфесій. Тут прынята з павагай ставіцца да традыцыяў суседзяў, кажа філолаг Уладзімер Камінскі:
– Віншую ўсіх слухачоў Радыё Рацыя! Тых, хто святкуе Раство Хрыстова ў гэты дзень, таксама тых, хто святкуе іншае свята – Трох Каралёў. Усім беларусам жадаю сілаў, мужнасці, моцы, каб здзяйсняць такія ўчынкі і развязваць такія задачы, якія нам падаюцца невырашальнымі, неразвязальнымі і неверагоднымі.
Вернікаў віншуе протаіерэй Свята-Георгіеўскай царквы г. Ліды Дзімітрый Тарарака:
– Паважаныя сябры, браты і сёстры! Сардэчна віншую вас з вялікім святам Нараджэння Хрыстовага і надыйшоўшым новым годам! Ад усёй душы жадаю вам Божага дабраславення і дапамогі ў кожны дзень вашага жыцця, у працы і ва ўсіх добрых справах. Спадзяюся, у гэтыя калядныя дні агенчык веры, надзеі і любові будзе саграваць вас і вы шчодра падзеліцеся гэтым цяплом з усімі, хто дарагія вашаму сэрцу. Са Святам!
У шматканфесійнай Лідзе багата вернікаў заходняй і усходняй цэркваў. Радыё Рацыя далучаецца да віншаванняў і жадае ўсім хрысціянам радасных святаў.
Ганна Комінч, Беларускае Радыё Рацыя
