Віцебск: сустрэчы з выбаршчыкамі – у будынку, дзе ідзе рамонт
Віцебская абласная бібліятэка абнесена будаўнічым плотам, хаця заяўлены рамонт фасада і ганкаў павінны быў скончыцца 23 ліпеня.
Гэты плот з’явіўся якраз на наступны дзень пасля сустрэчы з прэтэндэнтам на прэзідэнцкую пасаду Андрэем Дзмітрыевым.
Прапановы да гарадскіх уладаў, каб для сустрэчаў з выбаршчыкамі далі іншае памяшканне, раз ужо будынак бібліятэкі вымагае тэрміновага рамонту, мелі вынікам адмовы. Маўляў, у горадзе вызначана яшчэ 13 месцаў, хопіць і іх.
Між тым, абласная бібліятэка – найзручнейшае месца для сустрэчаў, бо месціцца ў цэнтры горада і мае вялікую канферэнц-залу. Цяпер наведнікам прапануюць абысці будынак з другога боку, дзе працуе будаўнічая тэхніка, і заходзіць праз запасны ўваход. Прыкметаў сканчэння рамонту не відаць.
Беларускае Радыё Рацыя
